Եվրասիական տնտեսական միության անդամ երկրների քաղաքացիներին կթույլատրվի Ռուսաստանում վարորդ աշխատել ազգային վարորդական իրավունքով: Համապատասխան նախագիծը մշակվում է Ռուսաստանի ներքին գործերի նախարարության կողմից, գրում է «ՌԻԱ Նովոստին»:
«Ճանապարհային երթևեկության անվտանգության մասին» դաշնային օրենքի փոփոխությունները հնարավորություն կտան ԵԱՏՄ բոլոր քաղաքացիներին փոխադրամիջոց վարել արտասահմանյան վարորդական իրավունքի հիման վրա, «եթե իրականացնում են ձեռնարկատիրական կամ աշխատանքային այնպիսի գործունեություն, որը կապ ունի տրանսպորտային միջոց վարելու հետ»:
Բացի այդ, նախագծով ենթադրվում է լուծել՝ անժամկետ արտասահմանյան վարորդական իրավունքների հետ կապված իրավական խնդիրը:
«Այդ կապակցությամբ, օրինագծով նախատեսվում է փոփոխություն, … որի համաձայն այն ազգային վարորդական վկայականները, որոնց տերերը մշտական բնակություն ունեն Ռուսաստանի Դաշնության տարածքում, ուժը կորցրած կճանաչվեն կամ ՌԴ տարածում մշտական բնակություն հաստատելու փաստաթուղթ ստանալուց 6 ամիս անց, կամ ՌԴ տարածք մուտք գործելուց 6 ամիս անց»,- ասվում է օրենքի նախագծում:
Պատրաստեց՝ Վիկտորյա ԱՆԴՐԵԱՍՅԱՆԸ
