Գլխավոր ավտոճանապարհից Քոբայրավանք հնարավոր է հասնել միայն ամենագնաց ավտոմեքենայով կամ մեկ կիլոմետրը ոտքով կտրելով՝ հիանալով Լոռվա աշնան գույներով: Մյուս ճանապարհը տեղացիները «սելի ճամփա» են անվանում: Խոնարհված, սակայն, միեւնույնն է՝ վեհաշուք Քոբայրի վանքը ժայռի կատարին է: Միջնադարյան վանական համալիրի ամրակայման աշխատանքներին հետեւելու եկած Մշակույթի նախարարին եւ լրագրողներին վերեւ են բարձրացնում շինարարական վերելակով. ոմանք էլ նախընտրում են ժայռի փեշերով բարձրանալ՝ թափվող ջրաշիթերի ու քարանձավերի մոտով:
Ժամանակին Հայաստանի գիտամշակութային հայտնի կենտրոն եղած Քոբայրավանքն ամբողջությամբ վերականգնել հնարավոր չէ, սակայն խնդիր է դրված ամրակայման ու որոշակի նորոգման աշխատանքների միջոցով սրբատեղին փրկել քայքայումից: Գլխավոր եկեղեցին եւ սեղանատան արեւելյան ճակատն այժմ ամրակայվում են, իսկ ահա տապանատան զանգակատունն ամբողջությամբ վերականգնված է՝ վերջին մի քանի տարվա աշխատանքի շնորհիվ: Այս տարի նաեւ տարածքի մաքրման եւ պեղման աշխատանքներ են կատարվել: «Եկեղեցու կառույցների որոշ բեկորներ են հայտնաբերվել, նաեւ՝ ուշ միջնադարյան տնտեսական կառույցներ են բացվել: Դրանք փաստում են, որ այստեղ մշտապես բնակեցված վանական գյուղ է եղել»,-լրագրողներին տեղեկացրեց Մշակույթի փոխնախարար Արեւ Սամուելյանը:
Արմեն Ամիրյանն էլ ասաց, որ ի տարբերություն Սանահինի վանական համալիրում արձանագրած թերությունների, Քոբայրավանքի նորոգման աշխատանքներից, ընդհանուր առմամբ, գոհ է:
Առաջիկայում Մշակույթի նախարարը կհետեւի Գոշավանքի ամրակայման աշխատանքներին: Նա այցեր է կատարում շինհրապարակներ՝ հուշարձանների նորոգման աշխատանքների հանդեպ հանրային հսկողություն սահմանելու եւ պատասխանատու-շինարարական ընկերությունների աշխատանքի պատասխանատվությունն ամրապնդելու նպատակով:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
