Երկու օր առաջ` դեկտեմբերի 10-ին, «Ռուսատոմ սերվիս»-ն ավարտեց «Հայկական ԱԷԿ»-ի առաջին տուրբոգեներատորի առաքումը Հայաստան: Այս մասին Aravot.am-ին հայտնեցին «Ռուսատոմ սերվիս» ընկերությունից: Այն ՀԱԷԿ-ի համար փոխադրվելիք երկու տուրբոգեներատորներից մեկն էր:
Տեղափոխումը Սանկտ Պետերբուրգի գործարանից, որտեղ արտադրվել են այդ սարքավորումները, տեղի է ունեցել երկու փուլով` ծովով դեպի Փոթի նավահանգիստ, այնտեղից էլ ցամաքային ճանապարհով մինչեւ հայկական ՀԱԷԿ:
Ինչպես հայտնում են «Ռուսատոմ սերվիս»-ից, նոր սարքավորումը կփոխարինի նախկինին, որը տեղադրվել էր անցյալ դարի 70-ական թվականներին: Տուրբոգեներատորի հետ մեկտեղ կփոխարինվեն նաեւ օժանդակ համակարգեր, ինչը հանդիսանում է նախագծի հատուկ աշխատանքներից:
ՀԱԷԿ-ի համար նախատեսված նոր տուրբոգեներատորներն արտադրվել են ռուսական «Силовые машины» ընկերության կողմից, որն այդ ոլորտի առաջատարներից է:
Ըստ նույն աղբյուրի, 2016 թվականին կնքված պայմանագրի համաձայն, տուրբոգեներատոր արտադրող ընկերությունը պետք է ՀԱԷԿ-ի արդիականացվող երկրորդ էներգաբլոկի համար պատրաստի եւ առաքի երկու ամբողջական տուրբին գեներատոր 236 ՄՎտ անվանական հզորությամբ:
Երկրորդ տուրբոգեներատորը Հայաստան կառաքվի 2018 թվականի դեկտեմբերին:
Պատրաստեց Լուսինե ԲՈՒԴԱՂՅԱՆԸ