Հայտնի լեզվաբան Փառանձեմ Մեյթիխանյանի ամուսնու՝ Եղիշե Խաչատրյանի սպանության գործով նիստն այսօր Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանում հետաձգվեց՝ ամբաստանյալներ Արտաշես Չիչոյանի շահերի պաշտպաններ Միհրան Պողոսյանի եւ Երեմ Սարգսյանի բացակայության պատճառով: Փաստաբան Միհրան Պողոսյանը դատարանին հայտնել էր, որ անհետաձգելի քննչական գործողության մասնակցելու պատճառով չի կարողանա մասնակցել նիստին, իսկ Երեմ Սարգսյանը վերջին մի քանի նիստերին չի ներկայացել:
Դատարանը նիստը հետաձգեց մինչեւ հունվարի 22-ը՝ ամբաստանյալներին տեղեկացնելով, որ հաջորդ նիստը կանցկացնի առանց նրանց պաշտպանների ներկայության, եթե նրանք կրկին չներկայանան:
Հիշեցնենք, որ Արտաշես Չիչոյանը, Խաչիկ Կոսյանը, Արարատ Նիկողոսյանը, Յուրի Հակոբյանը, Արթուր Զաքարյանը մեղադրվում են խուլիգանական դրդումներով Եղիշե Խաչատրյանին կյանքից զրկելու միասնական դիտավորությամբ, գիտակցելով մեկը մյուսի գործողությունները եւ մեկը մյուսի գործողությունները լրացնելով, խմբով ձեռքերով եւ ոտքերով անկանոն հարվածներ են հասցրել Եղիշե Խաչատրյանի կենսական նշանակություն ունեցող օրգանի` գլխի, ինչպես նաեւ կրծքավանդակի եւ որովայնի շրջաններում եւ պատճառելով կյանքի հետ անհամատեղելի մարմնական վնասվածքներ` ապօրինաբար Եղիշե Խաչատրյանին դիտավորությամբ զրկել են կյանքից:
Արփինե ՍԻՄՈՆՅԱՆ
