Վրացի իրավաբան Գեորգի Կոյավայի կարծիքով, Հայաստանի Քրեական օրենսգիրքը երկիրը գրավիչ է դարձնում «օրենքով գողերի» համար։
«Դուք չունեք Քրեական օրենսգրքում հոդված, որը պատիժ կնախատեսեր գողերի հանրությանը պատկանելու համար», – Sputnik Արմենիա ակումբում այսօր Երևան-Թբիլիսի տեսակապի ժամանակ ասաց Գեորգի Կոյավան:
Ըստ նրա՝ Վրաստանի ՔՕ 223 հոդվածը նախատեսում է 5-8 տարվա ազատազրկում «գողական աշխարհին» պատկանելու համար, իսկ «օրենքով գող» կարգավիճակի համար նախատեսվում է 10 տարվա ազատազրկում, օրենքը շարունակվում է խստացվել:
Փորձագետի խոսքով, «օրենքով գողերից» շատերը դեռ Միխայիլ Սահակաշվիլու նախագահության օրոք են հեռացել Վրաստանից:
«Ի դեպ, «օրենքով գողերի» շարքում շատ հայեր կան, որոնք Վրաստանի քաղաքացի են», — ասաց Կոյավան
Ռազմական փորձագետ Վախթանգ Մայիսայանն էլ նկատեց, որ «օրենքով գողերը» կարող են իրենց շատ լավ զգալ ամեն տեղ, նույնիսկ այն երկրներում, որտեղ սոցիալ-տնտեսական դրությունը վատ վիճակում է:
Արփինե ՍԻՄՈՆՅԱՆ
