Այսօր վանաձորցի երիտասարդներին են միացել նաեւ ավելի տարեց քաղաքացիները: Վանաձորի Հայքի հրապարակում հավաքված բազմաթիվ քաղաքացիների թվում էին նաեւ հարեւան Վրաստանից ժամանած հյուրեր: Վրացական պետհամարանիշերով մեքենայի վարորդի նկատմամբ ոստիկանները փորձում էին տուգանք նշանակել, ասելով, թե խախտել է երթեւեկության կանոնները: Ակտը կազմող ոստիկանը հրաժարվեց ներկայացնել արձանագրության կազմման պատճառը:
Իսկ վարորդի ընկերը փորձում էր միջամտել, եւ հարցն առանց տուգանքի կարգավորել. «Ես խնդրում ու պահանջում եմ, որ հարգեն մեր Վանաձորի հյուրերին, որոնք եկել են այս ցույցերին մասնակցեն: Հարգենք մեր դրսից եկած հյուրերին, ակտը չեղյալ համարենք: Եթե ես իմ քաղաքում չեմ կարողանում իմ հյուրին պաշտպանեմ, ուրեմն ինձ նման իշխանություն պետք չէ: Կրկին անգամ փաստվեց, որ էս իշխանությունները լավ ու վատ են անում, մեր ու ձեր են անում»,- հայտարարեց քաղաքացին:
Վերջինս, դիմելով քաղաքացիական հագուստով ոստիկանութան Լոռու մարզային վարչության պետ Արամ Ղազարյանին, հետաքրքրվեց. «Եթե դուք ծառայության մեջ եք, եւ չեք կրում համապատասխան հագուստ, դուք իրավունք ունե՞ք ինձ ասել, որ ես խոչընդոտում եմ»:
«Ես իրավունք ունեմ քաղաքացիական հագուստով ծառայություն իրականացնելու: Եթե այլ հարցեր չկան, ազատ եք: Անցիր քո երթին, մի խանգարի, չխոչընդոտեք»,- պատասխանեց ոստիկանության գնդապետը:
Մանրամասները՝ տեսանյութում
Տաթեւիկ ՂԱԶԱՐՅԱՆ
