«Սիրիայի իշխանությունները վերջին շրջանում հաջողություններ են արձանագրում. ԻՊ դիրքերը Սիրիայում զգալիորեն թուլացել են»,-«Փաստարկ» մամուլի ակումբում այսօր գնահատելով իրավիճակը Սիրիայում՝ ասաց թուրքագետ, արեւելագետ Ռուբեն Սաֆրաստյանը:
Նա նշեց, որ Սիրիայի կառավարության դիրքերն ուժեղանում են, իսկ Ասադի անձն արդեն ընդունելի է դառնում արեւմտյան մի շարք երկրների համար:
«Սիրիայի հյուսիսում՝ Իդլիբի շրջանում իրադրությունը կարգավորելու համար դեռ բավականին ժամանակ է պետք, իսկ ընդհանուր առմամբ՝ ահաբեկիչներին դուրս մղելու գործընթացը շարունակվում է»,- նկատեց նա:
Փորձագետի խոսքով՝ ազդակներ կան, որ Ասադի կառավարությունը սկսում է ընդունել Սիրիայի քրդական ինքնավարությունը, որը նախկինում չէր ընդունում. «Երկրի բարձրաստիճան պաշտոնյաների հայտարարությունները վկայում են, որ կարծես թե գործակցություն է ձեւավորում քրդերի եւ կառավարության միջեւ»:
Լուիզա ՍՈՒՔԻԱՍՅԱՆ