Տեղեկություններ են ստացվել, թե Չինաստանի դեսպանատունը բողոքի նոտա է ուղարկել «Օրինաց երկիր» կուսակցությանը, որը երկու շաբաթվա ընթացքում մեծացավ 9 հազար անդամով՝ իր թվակազմը հասցնելով մոտ 30 հազարի։ Այս առիթով «Օրինաց երկրի» նախագահ Արթուր Բաղդասարյանն «Առավոտ»-ին ասաց. «Այո, 20 օրվա ընթացքում մենք այդ ճանապարհն անցանք։ Սակայն հոգ չէ, որ բողոք կա։ Մեր կուսակցության քաղաքական խորհրդի անդամներից մեկը՝ Սերգեյ Երիցյանը, ջերմ հարաբերությունների մեջ է չինացիների հետ, եւ «Կարծիք» հաղորդաշարով նրանց մի քանի հաղորդում է նվիրել։ Կարծում եմ՝ նրան կհաջողվի բարեկամական հարաբերություններ հաստատել Չինաստանի եւ «Օրինաց երկրի» միջեւ»։
ՍՈՎՈՐԵԼ, ՍՈՎՈՐԵԼ, ՍՈՎՈՐԵԼ
Ընտրական համակարգերի միջազգային հաստատության (IFES) եւ ԿԸՀ-ի համագործակցությամբ մարտի 29-ին կկազմակերպվի ուսումնական դասընթաց՝ գործող մարզային ընտրական հանձնաժողովների անդամների համար։ Սեմինարի ավարտին նախատեսված է ՄԸՀ անդամների վարքագծի կանոնագրի ստորագրում։
ԱՌԱՋԻՆ ԸՆԹԵՐՑՈՒՄԸ
Կարդացեք նաև
Երեկ ԱԺ-ն առաջին ընթերցմամբ նաեւ ընդունեց «Վանաձորի քիմիական համալիրի վերագործարկման համար անհրաժեշտ միջոցառումների մասին» ՀՀ օրենքի նախագիծը։ Հիշեցնենք, որ միջոցառումները նախատեսում են 3 ձեռնարկությունների բյուջետային պարտքերի ներում, որից հետո դրանց տերն է դառնալու մոսկվահայ հայտնի գործարար Սենիկ Գեւորգյանը։
ԸՆՏԱՆԵԿԱՆ ՖՐԱԿՑԻԱ ՉԻ ԼԻՆԻ
Անցնող խորհրդարանի ֆենոմեններից մեկն էլ Գեւորգյան եղբայրներն են՝ Սամվելը, Գեւորգը, Ժիրայրը։ Նրանցից վերջինը որոշել է վերաքվեարկվել, իսկ ահա Գեւորգ Գեւորգյանը չի մասնակցելու ԱԺ ընտրություններին։ Սամվել Գեւորգյանի տեսակետը դեռեւս հայտնի չէ։
