Աշխարհի լավագույն բուհերի վարկանիշում Հայաստանից 2 համալսարան է ընդգրկվել՝ Երևանի պետական համալսարանը և Հայաստանի եվրոպական համալսարանը, որոնք ներառված են 2001+ հորիզոնականներում։
«Times Higher Education»-ի World University Rankings 2027 համաշխարհային վարկանիշում ներառվել է 118 երկրի 2297 բարձրագույն ուսումնական հաստատություն։
Առաջին տեղում՝ 11-րդ տարին անընդմեջ, Օքսֆորդի համալսարանն է, սակայն այն ընդամենը չնչին առավելությամբ է առաջ անցել Մասաչուսեթսի տեխնոլոգիական ինստիտուտից (MIT):
Թեև Օքսֆորդը լավ արդյունքներ է գրանցել հետազոտական արտադրողականության, միջազգային համահեղինակության և դոկտորական աստիճան ունեցող աշխատակիցների հարաբերակցության ցուցանիշներով, MIT-ն ավելի լավ ցուցանիշ է ունեցել ուսանող-աշխատակից հարաբերակցության, մեջբերումների ազդեցության և հետազոտական հզորության գնահատականի առումով։ Ընդհանուր գնահատականի առումով երկու հաստատությունների միջև տարբերությունն ընդամենը 0,1 միավոր է։
Կարդացեք նաև
Նշվում է, թե «համաշխարհային ակադեմիական ոլորտի բարձրագույն հորիզոններում արևմտյան համալսարանների մենաշնորհը գնալով ավելի երերուն է թվում, քանի որ ավանդաբար առաջատար համարվող հաստատությունները հույսը դնում են իրենց հեղինակության կայունության վրա՝ հետազոտական գործունեության ցուցանիշների թուլացումը փոխհատուցելու համար։
Ասիական համալսարաններն անցյալ տարի՝ կարճատև դադարից հետո, վերսկսել են իրենց առաջընթացը վարկանիշային աղյուսակում՝ հուշելով, որ երկար ժամանակ գոյություն ունեցող համաշխարհային կարգը կարող է վերջնական փոփոխման շեմին լինել։
Ասիայի առաջատար հաստատությունը՝ Չինաստանի Ցինհուա համալսարանը, 11-րդ հորիզոնականի համար պայքարում շրջանցեց շվեյցարական ETH Zurich-ին՝ ընդամենը մի փոքր զիջելով լավագույն տասնյակում տեղ զբաղեցնելու հնարավորությունը։ Սա նշանակում է, որ ասիական ամենաբարձր վարկանիշ ունեցող համալսարանն այժմ գերազանցում է մայրցամաքային Եվրոպայի լավագույն համալսարանին»։
Պեկինի մանկավարժական համալսարանը (Beijing Normal University) զբաղեցնում է 128-րդ հորիզոնականը:
