Երեկ «Առավոտի» «Կրակոցներ, որ ներիշխանական լարվածության պարպման առիթ դարձան» հրապարակման մեջ մեջբերել էինք Արծրուն Մարգարյանի՝ իրավապահ համակարգին իրազեկ մերձավորների գնահատականը, որոնք խիստ վերապահումով էին ընդունել այն հնարավորությունը, թե փորձաքննությունը թքի բաղադրությունից կարող էր Հրանտ Պապիկյանի արյան խումբը որոշել։ Դատախազական համակարգի երկարամյա մի աշխատակից իր հերթին վիճարկեց այդ պնդումն անողների իրազեկությունը։ Այլապես տեղյակ կլինեին, որ նման փորձաքննություններ վաղուց կիրառվում են նաեւ այլ հանցագործությունների պարագայում։
ՎԱՏ ԼՈՒՐ
Ականատեսների վկայությամբ, միայն Գարեգին կաթողիկոսի հիշեցումից հետո է Երուսաղեմի Սուրբ Ծննդյան տաճարում Ռոբերտ Քոչարյանը կռացել եւ համբուրել Ծննդյան քարայրը խորհրդանշող աստղը։ Մինչդեռ այս սրբավայրի առջեւ խոնարհվել էին ե՛ւ Բորիս Ելցինը, ե՛ւ պետությունների ղեկավարները։ Միայն քրիստոնեությունն առաջինն ընդունած ժողովրդի ղեկավարին է այս առիթով հատուկ հիշեցման անհրաժեշտություն եղել։
