Նախագահի հրաժարականի եւ արտահերթ նախագահական ընտրությունների մասին անցած շաբաթ արված իր հայտարարությամբ ԱԺՄ վարչության նախագահ Վազգեն Մանուկյանը քարը գլորեց։ Ովքե՞ր կգնան քարի ետեւից։ Արդյո՞ք, Վազգեն Մանուկյանի տեսակետը նաեւ վարչության տեսակետն է. «Վարչությունում կան տարբեր կարծիքներ, սա վարչության որոշումը չի եղել, բայց Վազգեն Մանուկյանն իր տեսակետներն է արտահայտել այդ օրվա ասուլիսում»,- այսպես պատասխանեց մեր հարցին ԱԺՄ վարչության անդամ Դավիթ Վարդանյանը։
Պարոն Վարդանյանի հետ «Առավոտի» հարցազրույցը կարդացեք առաջիկա համարներից մեկում։
ՆԱԽԱԳԱՀՆԵՐ ԵՎ ՎԱՐՉԱՊԵՏՆԵՐ
Կարդացեք նաև
ԼՂՀ նախագահ Արկադի Ղուկասյանը եւս երեկ ժամանեց Հայաստան։ Մինչ այդ այստեղ էր գտնվում նաեւ ԼՂՀ վարչապետը։ ՀՀ նախագահն ու վարչապետը, երեկվա դրությամբ, գտնվում էին Մոսկվայում։ Մեզ հետաքրքրեց, թե ում հետ է մտադիր հանդիպումներ ունենալ ԼՂՀ նախագահը։ Արցախի մշտական ներկայացուցչությունից մեզ տեղեկացրին, որ սա հերթական աշխատանքային այց է եւ դժվար թե որեւէ արտառոց հանդիպում լինի։ Փաստորեն, երեկվա դրությամբ, Արցախում եւ Հայաստանում նախագահներ եւ վարչապետներ չկային։
ՀԱՐԵՎԱՆՆԵՐԻՆ ՋՈՒՐ ԵՆ ՏԱԼԻՍ
Դավթաշենի համայնքապետ Սուրիկ Ղուկասյանը երեւի շուտով կսկսի օդը եւս վաճառել։ Դավթաշենին հարող մի տարածք կա Հրազդան գետի բարձրադիր ափին, որը մաս-մաս ժամանակին սեփականաշնորհվեց։ Հիմա էլ համայնքապետը թույլատրել է թաղամասի խմելու ջրի հիմնական ջրատարից ապօրինի ջրագիծ անցկացնել դեպի վերոհիշյալ տարածքում կառուցված առանձնատները։ Արդյունքում՝ կտրուկ վատացել է չորրորդ թաղամասի ջրամատակարարումը։
