Ներիշխանական շրջանակներում վերջերս քննարկվում է ուժային երկու գործիչների հակամարտության թեման։ Խոսքը ռազմական ոստիկանության պետ Վլադիմիր Գասպարյանի եւ Ազգային անվտանգության փոխնախարար Գրիգորի Հարությունյանի պարբերական հեռակա ընդհարումների մասին է։ Թե ինչից է սկսվել այս ամենը՝ տարբեր ասեկոսեներ կան։
Ըստ մի վարկածի, մի օր Գրիշա Հարությունյանն իր մեքենան կանգնեցրել է պարետատան դիմաց՝ պատրաստվելով մոտակա սրճարաններից մեկում սուրճ ըմպել։ Սակայն Վովա Գասպարյանի թիկնապահները՝ «Լիդեր» եւ «Շերիֆ» մականուններով, որ ի նշան իրենց շեֆի նկատմամբ հավատարմության՝ կտրել էին իրենց ճկույթները՝ պարետատնից դուրս գալով Գրիշա Հարությունյանին բավական կոպտորեն են փոխանցել այն արգելքը, թե արգելվում է այդ շենքի դիմաց կանգառը. «Մեքենադ վերցրու ու գնա այստեղից»։ Ըստ այլ վարկածի, շահերի բախում է տեղի ունեցել մի յուղոտ պատառի՝ արդեն իսկ լուծարված «Երեւանսերվիս» ձեռնարկության շուրջ, որը ղեկավարում էր ռազմական ոստիկանության պետի եղբայրը՝ Սամվել Գասպարյանը։
Այլ ասեկոսեներ էլ կան. թե ռազմական ոստիկանության աշխատակիցները, երբ 8 մարդու սպանած երկու զինվորներին էին փնտրում, նաեւ մի խիստ բարձրաստիճանի թիկնապահների են ստուգել (իսկ նրանք ԱԱՆ աշխատակիցներ են)։ Թե Գրիշա Հարությունյանը սպառնացել է, որ վերցնելու է ռազմական ոստիկանության շենքը։ Թե Վովա Գասպարյանն այսպես է արձագանքել այդ սպառնալիքին. «Բա ո՞նց են Վազգեն Սարգսյանի քանդակի մոտով անցնելու»։ Թե նրա թիկնապահներին ԱԱՆ-ն թույլ չի տվել օդանավակայան մտնել, երբ ռազմական ոստիկանության պետը գնացել է ինչ-որ մեկին դիմավորելու…
Ի դեպ, մենք շրջանառվող բոլոր լուրերը չէ, որ մեջբերեցինք։
Կարդացեք նաև
Սեփ. լր.
