ԿԱՅՍՐԻՆԸ՝ ԿԱՅՍՐԻՆ, ՀԱՎԱԿՆՈՐԴՆԵՐԻՆԸ՝ ՀԱՎԱԿՆՈՐԴՆԵՐԻՆ «Եթե «Խազանովի թութակին» վանդակով կախեին ՀՀ արդարադատության նախարարության շենքի մուտքի մոտ, նա կոկորդով մեկ կգոռար. «Ընկերներ, արդարադատության նախարարությունը թուղթ չունի, խեղճ վիճակում է հայտնվել։ Բոլոր դիմողները նախարարությանը թող աջակցեն թղթով, այն էլ՝ մեկ տուփ, տուփի մեջ պետք է լինի 500 հատ՝ ոչ պակաս»։ Բայց թուղթ պահանջվեց մոտ 200 փաստաբան հավակնորդներից։ 1 տուփն էլ շուկայական արժեքով 2500 դրամ է, ստացվեց…»։ Փաստաբան հավակնորդներից մեկն այսպես էր գրել «Առավոտ»-ին ուղարկած իր նամակում, որի կապակցությամբ էլ երեկ դիմեցինք արդարադատության նախարարի մամլո քարտուղար Գայանե Աբրահամյանին, թե ինչո՞ւ է պահանջվել թուղթ հունվարի 20-ից առաջ (քննությունների) եւ արդյոք նախարարությունը չունե՞ր միջոցներ քննությունները կազմակերպելու համար։ Նա ասաց. – Որեւէ պետական տուրք փաստաբանների քննություններին մասնակցելու համար՝ «Պետտուրքի մասին» ՀՀ օրենքով նախատեսված չէ։ Քննությունները կազմակերպող հանձնաժողովն աշխատում է հասարակական հիմունքներով։ Արդարադատության նախարարությունն իր հաշվին ֆինանսավորել է տպարանում հավակնորդների վկայականները՝ նրանց առաջադրանքները տպագրելու համար։ Ինչ վերաբերում է թղթին, հավակնորդները թուղթ կստանան քննությունների ժամանակ։ Իսկ մեր այն հարցին, թե եղե՞լ են դիմումների ընդունման կապակցությամբ բողոքարկուներ մինչ օրս, Գ. Աբրահամյանը հիշեցրեց, որ բոլոր դիմորդների փաստաթղթերի ընդունման ժամկետը եղել է մինչեւ նոյեմբերի 30-ը. «Մեզ համար նշանակություն չուներ 200, 205, թե ավելի շատ հավակնորդ կունենայինք, եւ որեւէ միտում դիմումների ընդունման հետ կապված չի եղել»։ Ռ. Մ.
