Հուլիսի 29-ին Սախալինյան երկաթուղու ղեկավարությունը Յուժնո-Սախալինյան եւ Կուրիլյան թեմին է հանձնել խորհրդանշական վագոն-եկեղեցու բանալին, որը երթեւեկելու է գնացքների կազմում:
Սախալինյան երկաթուղու մամլո քարտուղար Սերգեյ Դաշչինսկին հայտնել է, որ ճանապարհ ընկնելուց առաջ վագոն-եկեղեցին կօծվի Յուժնո-Սախալինյան եւ Կուրիլյան թեմի հոգեւորական Դանիիլ եպիսկոպոսի կողմից:
«Սախալինյան երկաթուղին հատուկ նախագծով վերանորոգել է ուղեւորատար վագոններից մեկը: Վագոնի մի մասը գրավում է խոհանոցը, երկու կուպե՝ ութ տեղով, հոգեւորականների հագստի համար է, մնացած մասը խորանն է եւ արարողությունների՝ մկրտությունների եւ պսակադրությունների կատարման տեղը»,- պատմել է Ս. Դաշչինսկին:
Նրա խոսքերով՝ վագոն-եկեղեցին 2-3-ական օր գործելու է այն կայարաններում, որտեղ չկան ուղղափառ ծխեր: Դաշչինսկին նշել է, որ «Ռուսական երկաթուղիների» համարյա բոլոր մասնաճյուղերում այսօր արդեն նմանատիպ վագոն-եկեղեցիներ կան՝ բեռնատար եւ ուղեւորատար գնացքների կազմում:
