«Առավոտի» լավատեղյակ աղբյուրների հաղորդմամբ, այս պահին Շիրակի մարզի համայնքապետարաններում ու պետական կառույցներում ստուգումներ անցկացնող Ազգային ժողովի Վերահսկիչ պալատը անչափ հետաքրքրված է մարզի՝ 2007-2009 թվականներին ապամոնտաժված ջրագծերով: Հիշեցնենք, որ խոսքը ալան-թալանի ենթարկված թուջե թանկարժեք խողովակների մասին է, որի ապօրինի ապամոնտաժման մեջ Շիրակի գյուղացիները, մասնավորապես՝ մարմարաշենցիները, երեք տարի առաջ մեղադրում էին նաեւ տարածքային կառավարման նախկին նախարար Հովիկ Աբրահամյանին: Այս մասին «Առավոտը» մի քանի անգամ անդրադարձել է: Մտածել, թե ԱԺ Վերահսկիչ պալատը օբյեկտիվ ստուգումներ կանցկացնի եւ կբարձրաձայնի թալանի հարցը, մարզի բնակիչների կարծիքով՝ առնվազն միամտություն է, հատկապես, որ, ըստ մեր աղբյուրների, Վերահսկիչի ստուգումներին արդեն սկսել են խանգարել նաեւ Շիրակի մարզի որոշ իրավապահներ:
