Մայրաքաղաքի ջրային ավազանների խնամքն ու սպասարկումը պատշաճ կազմակերպելու նպատակով, համաձայն Երեւանի քաղաքապետարանի տեղեկատվության եւ հասարակայնության հետ կապերի վարչության, Երեւանի քաղաքապետ Գագիկ Բեգլարյանի հանձնարարությամբ «Ջրային կառույցներ» ՓԲԸ-ում ստեղծվել է «Լվացման եւ մաքրման» հատուկ ծառայություն, որը զբաղվում է մայրաքաղաքի ջրավազանների մաքրման աշխատանքներով: Ծառայությունը համալրված է նոր, ժամանակակից հատուկ տեխնիկական միջոցներով: Գերմանական «Կերխեր» ֆիրմայի արտադրության թվով 5 սարքավորումները, բարձր ճնշման շնորհիվ, հնարավորություն են տալիս ամբողջությամբ մաքրել եւ ախտահանել ջրավազանները: Օգտագործվում են ջրավազանների մաքրման համար նախատեսված հատուկ հեղուկներ, ինչի շնորհիվ ամբողջությամբ մաքրվում է նաեւ ջրավազանների հատակին առաջացած մամուռի շերտը: Երեւանի քաղաքապետարանի ենթակայության 16 ջրային կառույցների խնամքն արդեն իրականացվում է այս տեխնոլոգիայով: Մինչ այս երեւանյան ջրավազանները մաքրվում էին սովորական ջրով` խողովակների օգնությամբ: Մասնագիտացված խումբը յուրաքանչյուր շաբաթ իրականացնում է մայրաքաղաքի ջրային կառույցների մաքրման աշխատանքները: Հատուկ տեխնիկայի ձեռքբերման համար ծախսվել է 6 մլն դրամ:
Ի դեպ, երկու օր առաջ Երեւանի քաղաքապետի հանձնարարությամբ Երեւանի կենդանաբանական այգուց Կարապի լիճ են տեղափոխվել երկու սեւաթույր կարապներ: Կարապների զույգի համար արեւից պատսպարվելու եւ հանգստանալու համար առանձին տեղ է առանձնացվել: Կարապների խնամքով եւ սննդակարգով զբաղվելու են Երեւանի կենդանաբանական այգու մասնագետները, որոնք հորդորում են, որ Կարապի լճի այցելուները թռչուններին չվնասելու համար զերծ մնան կարապներին կերակրելու գայթակղությունից:
