Ադրբեջանում ազատ է արձակվել երիտասարդ ակտիվիստ եւ բլոգեր Ադնան Հաջիզադեն, որը դատապարտվել էր, իբր, խուլիգանություն կատարելու մեղադրանքով: Նա հայտնի էր դարձել մասնավորապես որպես նրա կալանավորմանն անմիջապես նախորդած եւ ապա համացանցում շրջանառության մեջ դրված «ավանակային ասուլիսի» մասնակից:
Երիտասարդ բլոգերին պայմանական վաղաժամկետ ազատ արձակելու որոշումը կայացրել է Բաքվի վճռաբեկ դատարանը:
Հիշեցնենք, որ 2009թ. հուլիսին Բաքվի ռեստորաններից մեկում խուլիգանություն կատարելու մեղադրանքով կալանավորվել էին երկու երիտասարդ բլոգերներ՝ Էմին Միլլին եւ Ադնան Հաջիզադեն: Նրանք դատապարտվել էին 2 եւ 2,5 տարվա ազատազրկման:
Դատավճիռը մեծ արձագանք էր առաջացրել ինչպես Ադրբեջանում, այնպես էլ նրա սահմաններից դուրս: Երիտասարդներին ազատ արձակելու պահանջով հանդես էին եկել միջազգային իրավապաշտպան կազմակերպությունները, ԵԱՀԿ-ն եւ նույնիսկ ԱՄՆ նախագահ Բարաք Օբաման:
