Բաքվում գտնվող Իրանի նախագահ Մահմուդ Ահմադինեջադը երեկ իր ասուլիսում անդրադառնալով ամուսնական անհավատարմության համար քարկոծման միջոցով մահապատժի դատապարտված Սակինե Աշտիանիի դատական գործին, ասել է, թե այն դեռ շարունակվում է, ու որեւէ խնդիր այդ գործի քննության ընթացքում չկա:
APA-ի փոխանցմամբ, ի պատասխան այն հարցին, թե՝ մահապատժի դատավճիռն արդյոք իրականացվելո՞ւ է, Ահմադինեջադը հայտարարել է, թե իր ունեցած տեղեկություններով ԱՄՆ-ում 53 կանանց նկատմամբ մահապատժի դատավճիռ է կայացվել, բայց ոչ ոք դա անարդար չի համարել. «Այնտեղ կայացված դատավճիռները օրինական են համարվում, իսկ երբ Իրանում են նման որոշումներ կայացվում, դա գնահատվում է որպես՝ մարդու իրավունքների ոտնահարում: Այդ ուժերը համամարդկային հարցերում էլ են քաղաքական օգուտներ փնտրում: Ինչո՞ւ են բոլորը լռում մահապատիժների մասին, որոնք կայացվել են այնտեղ, իսկ երբ խոսքը վերաբերում է Իրանին, ապա աղմուկ է բարձրացվում այնպիսի հարցերի շուրջ, որոնք առկա չեն»:
Ի դեպ, նույն ասուլիսում Իրանի նախագահը խոսել է նաեւ ԱՄՆ-ում 2001թ. սեպտեմբերի 11-ի ահաբեկչության մասին եւ հայտարարել, թե «սեպտեմբերի 11-ի իրադարձություններում ԱՄՆ-ն ե՛ւ հայցվոր է, ե՛ւ դատավոր, ե՛ւ կատարող»: Նրա ասելով, սեպտեմբերի 11-ի իրադարձությունները անհրաժեշտ է անկողմնակալ քննել. «Սեպտեմբերի 11-ի իրադարձություններից հետո տարածաշրջանում մոտ մեկ միլիոն մարդ է զոհվել, օկուպացվել է երկու երկիր: Վստահությամբ հայտարարում եմ, որ տարածաշրջանի ժողովուրդները որեւէ անգամ փոքր առնչություն չունեն սեպտեմբերի 11-ի հետ»:
