Այսօր «Հայելի» ակումբում խոսելով արվեստագետների քաղաքականացվելու մասին, դերասան Սերգեյ Դանիելյանը (Յոժ) հայտարարեց, որ ինքը բոյկոտում է քաղաքականությունը եւ մասնավորապես ընտրությունների ժամանակ ինչ-որ մեկի «դրոշի» ներքո հանդես չի գա. «Արվեստագետը պիտի չեզոք մնա, ես էդ գործում չկամ»:
«Պալատական» արվեստագետների ու նրանց պատկերներով «Իմ զենքը…» պաստառների մասին խոսելիս, դրանք ծաղրող Ռուբեն Հախվերդյանին Յոժն ասաց. «Պատկերացնում եմ Ձեր դեպքում Ձեր զենքը ինչը կլիներ»: Իսկ դրանից առաջ Հախվերդյանը խոսել էր իր օրգաններից մեկը Սարոյանի օրինակով հայրենիքում թողնելու մասին:
Սերգեյ Դանիելյանն արվեստագետներին առաջարկեց չծախվել՝ «Էդ ինչքա՞ն փող պիտի տան, որ կանգնեք ինչ-որ դեպուտատի, նախագահի կամ օլիգարխի կողքին»:
Այնուհետեւ հավելեց. «Շուտով կսկսեն ձեզ լիքը բաներ առաջարկել, չգիտեմ՝ ով կերգի, ով կպարի կամ կարտասանի, բայց ես խորհուրդ եմ տալիս, որ գոնե էդ բանը, որ անում եք, ինչ-որ մեկի կողքին կանգնած չանեք, խոստումները սուտ են, դո՛ւք էլ եք վարկաբեկվում: Եթե ես արվեստագետ եմ, համերգ եմ դրել, դա իմ աշխատանքն է, որ անում եմ, բայց եթե այդ համերգը ինչ-որ լոզունգի տակ եմ անում, նշանակում է՝ որեւէ մեկի ջրաղացին ջուր եմ լցնում: Վաղը կպարզվի, որ էդ մարդը հանցագործ է, եսիմ ինչ է: Հետո ձեզ են հիշելու, ձեր արածը, թե չէ քաղաքական գործիչը զուգարանի թղթի նման բան է, օգտագործեցին, գնաց»:
Կարդացեք նաև
Դերասանն ասուլիսում անդրադարձավ նաեւ մեր իրականությանն ու օրենքներին, որոնց անկատարությունը մեկնաբանեց սեփական օրինակով. «Վերջերս նորից տեխասմոտր եմ անցել: 20 տարվա ընթացքում չհասկացանք՝ տեխստուգատես Հայաստանում ո՞նց պետք է անցնեն: Ամեն անգամ բան են փոխում, դա նշանակում է, որ էն մարդը, որ ստեղծում է օրենք, շիմպանզեի ուղեղ ունի…»:
Գոհար ՀԱԿՈԲՅԱՆ
