«Առավոտը» զրուցել է արտակարգ իրավիճակների նախարար, «Օրինաց երկիր» կուսակցության ներկայացուցիչ Արմեն Երիցյանի հետ: «Առավոտի» հարցին` «Արդյո՞ք ՕԵԿ վարկանիշը այսօր բավարա՞ր է նորից մարդկանց քվեներն ակնկալելու համար: Ժամանակին այդ վարկանիշը բավականին ընկավ հայտնի դեպքերի բերումով, այսօր ինչպիսի՞ն են ՕԵԿ-ի սպասելիքները», պարոն Երիցյանը պատասխանեց.«Ես չեմ ընդունում, որ մեր կուսակցության վարկանիշն ընկավ: Արթուր Բաղդասարյանը կանգնեց Սերժ Սարգսյանի կողքին, եւ դա շատ ճիշտ քայլ էր: Արթուր Բաղդասարյանն այսօր այն քաղաքական գործիչն է, ով ունի իր դեմքը, ինքը միակ գործիչն է եղել, որ իր ձեռքով գրեց եւ հրաժարվեց ԱԺ նախագահի պաշտոնից` դառնալով ընդդիմություն: Ինքը վախկոտ տղա չի, եկեք սրանից սկսենք, ինքը պաշտոնի համար չկանգնեց Սերժ Սարգսյանի կողքին, ոչ, ինքը զգաց, որ եթե այդ պահին հանկարծ սխալ քայլ արվի, գուցե ամբողջ երկիրը գնա անդունդ: Իսկ մեր հարեւանները, իհարկե, սպասում են, որ մեր երկրում այդպիսի վիճակ ստեղծվի: Այդ պատճառով, յուրաքանչյուրը պետք է մտածի, թե ո՞ր քայլն է ճիշտ: Ես համոզված եմ, որ 2008-ին Արթուր Բաղդասարյանի քայլը շատ ճիշտ էր , ինքը ճիշտ է կողմնորոշվել` կանգնելով Սերժ Սարգսյանի կողքին: Տեսեք, թե վերջին տարիներին մեր երկիրը ինչ զարգացում ապրեց: Ինչ վերաբերում է կուսակցության վարկանիշին,ապա այն բարձր է, եւ եթե դուք ամեն հինգշաբթի գաք կուսակցության գրասենյակ, կտեսնեք, թե մեր կուսակցության քաղխորհրդի նիստերում որքան մարդ է գալիս եւ անդամագրվում մեր կուսակցությանը»: «Դուք ղեկավարում եք ՀՀ արտակարգ իրավիճակների նախարարությունը, որն այսօր դարձրել է բավականին հզոր կառույց: Ըստ Ձեզ` ի՞նչ կլինի քաղաքական դաշտում, հնարավոր համարո՞ւմ եք արտակարգ իրավիճակներ ընտրական գործընթացներում»,- մեր այս հարցին էլ պարոն Երիցյանը պատասխանեց.«Աստված չանի, որ արտակարգ իրավիճակներ լինեն, դա մեր այս փոքրիկ երկրի վերջի սկիզբը կդառնա»:
Արտակարգ իրավիճակների նախարար Արմեն Երիցյանի հետ հարցազրույցն ամբողջությամբ կարդացեք տպագիր «Առավոտում»:
