Այսօր Ծաղկաձորում տեղի ունեցավ հայ-վրացական «Ձմեռային ուսանողական դպրոց» ճամբարի փակման արարողությունը:
Հունվարի 27-ին Հայաստանի երիտասարդական հիմնադրամի Ծաղկաձորի երիտասարդական կենտրոնում բացված ձմեռային դպրոցին մասնակցում էին շուրջ 80 հայ եւ վրացի ուսանողներ, ինչպես նաեւ` ասպիրանտներ եւ երիտասարդ գիտնականներ:
Ծրագրի փակմանը ներկա ՀՀ-ում Վրաստանի դեսպան Գեորգի Տաբատաձեն նշեց, որ ուսանողների հետ հանդիպումները մեծ նշանակություն ունեն բարեկամ երկրների հարաբերությունները զարգացնելու գործում: Դեսպանը ցավ է ապրել` իմանալով, որ իր երեխաները շատ քիչ տեղեկություններ ունեն Հայաստանի մասին:
Գեորգի Տաբատաձեն կարեւորեց կրթական ոլորտի բարեփոխումները` տեղեկացնելով, որ առաջիկայում Հայաստանի եւ Վրաստանի նախագահների կողմից հատկացվելիք ֆինանսավորման շնորհիվ հայ ուսանողները կսովորեն Վրաստանի բարձրագույն ուսումնական հաստատություններում, իսկ վրացիները` Հայաստանի:
Կարդացեք նաև
ԵՊՀ ռեկտոր Արամ Սիմոնյանը նշեց, որ համալսարանը շահագրգիռ է համագործակցել վրացի ուսանողների «մասով». «Համագործակցության մեխը պետք է դառնա երկու կողմերի ուսանողների ինչպես կարճատեւ, այնպես էլ` երկարատեւ այցելությունները, իսկ նրանց հավաքած կրեդիտները ճանաչելի լինեն երկու երկրում էլ»:
ԵՊՀ ռեկտորի տեղեկացմամբ` օտարերկրյա երիտասարդների ուսուցումը կազմակերպելու համար համալսարանում գործում է Միջազգային կրթական կենտրոն, որտեղ իրականացվում են մեկամյա նախապատրաստական դասընթացներ, դասախոսների եւ գիտաշխատողների վերապատրաստումներ, իսկ սփյուռքահայերին հնարավորություն է տրվում շարունակել կրթությունը` կատարելագործելով արեւելահայերենի տիրապետումը:
«Ձմեռային ուսանողական դպրոցի» 6 օրերի ընթացքում մասնակիցները հանդես են եկել դասախոսություններով, մասնակցել քննարկումների, ինտելեկտուալ խաղերի եւ սպորտային միջոցառումների:
Փակման արարողության ընթացքում երկու երկրների ուսանողները Ա. Սիմոնյանի կողմից արժանացան պատվոգրերի:
Լուիզա ՍՈՒՔԻԱՍՅԱՆ
