Aravot.am –ի հետ զրույցում Գյումրու «Ցայգ» հեռուստաընկերության նախագահ Մարգարիտա Մինասյանը տեղեկացրեց, որ քաղաքական գովազդի մեկ րոպեն իրենց մոտ սահմանվել է 6 հազար դրամ, ներառյալ ավելացված արժեքի հարկը: Այն տրամադրվելու է մեծամասնական ընտրակարգով առաջադրվող թեկնածուներին: «Իհարկե, մենք նախկինում ավելի բարձր գներ ենք սահմանել, բայց նախկինում զեղչերի ավելի ճկուն համակարգ է աշխատել, էս դեպքում օրենքը չի թույլատրում մեզ ոչ մի տիպի զեղչեր կամ բոնուսային ինչ-որ ավել ցուցադրումներ տալ»,-ասաց մեր զրուցակիցը:
Իսկ հնարավո՞ր է հեռուստատեսությունը թեկնածուների համար նիսյայով գործ անի. նշենք, որ Գյումրիում այնպիսի լճացած վիճակ է, որ նույնիսկ ոսկյա ամենաթանկարժեք զարդերն ու կահույքն են նիսյայով վաճառում, միայն թե գնորդ գտնվի: «Հնարավոր չէ, քանի որ դրանով առաջին հերթին մենք կվնասենք առաջադրվող թեկնածուին, որովհետև ինքն անմիջապես իր հիմնադրամից պիտի ուղղորդի գումարները հեռուստաընկերություն ու էնտեղից անմիջապես կտրոնները վերցնի», -բացառեց տիկին Մինասյանը:
Նունե ԱՐԵՎՇԱՏՅԱՆ
