Կուսակցությունները ԱԺ ընտրապայքարում ոչ թե գաղափարներով, այլ ամեն մեկն իր թիմին օգնելու ու առաջ մղելու սկզբունքով են պայքարում: Aravot.am-ի հետ զրույցում նման կարծիք հայտնեց «Ազգային համագործակցություն» հիմնադրամի գործադիր տնօրեն Արշակ Սադոյանը: Նրա խոսքերով կուսակցությունները չեն տարբերվում ոչ մոտեցումներով, ոչ էլ գաղափարական առանձնահատկություններով. «Գաղափարական առանձնահատկությունները ոչ միայն չեն շեշտում, այլեւ փորձ է արվում այնպես անել, որ ամոթ է դրա մասին խոսելը: Ես սկզբունքային մոտեցումների, գաղափարների տեսակետից տարբերություններ չեմ տեսնում… Եթե ասում ենք բազմակարծությունը օգտակար է երկրին, առաջին հերթին նկատի ունենք տարբեր ճանապարհների առկայությունը, որը հնարավորություն է տալիս ընտրել ամենաարդյունավետը, բայց տարբերություններ չկան, դառնում է կլանային համակարգ՝ քաղաքական դաշտում, դա ողբերգություն է : Ցանկալի կլիներ, որ կուսակցություններում լինեն գաղափարական մոտեցումներ, գաղափարական տարբերություններ, եւ ընտրություններում էլ պայքարը գնա ծրագրերի, գաղափարների, ոչ թե ում թիմն ինչքան մեծաքանակ կողմնակիցներ ձեռք կբերի ու կկարողանա ստիպել իր տեսակետի հետ հաշվի նստել»:
Արփինե ՍԻՄՈՆՅԱՆ
