Պատգամավորի թեկնածուների ու ՀԱԿ անդամների նկատմամբ կիրառվող բռնությունները «Միավորված հայեր» կուսակցության փոխնախագահ Հովհաննես Հովհաննիսյանը բացատրում է Հայաստանում օրենքի բացակայությամբ. «Կոչ ենք անում բոլորին շարժվել օրենքով: Մենք պետք է լինենք օրենքի ստրուկը, այլ ոչ թե ինչ-որ առանձին անձնավորություններ փորձեն օրենքը դարձնել իրենց ստրուկը»:
Նրա խոսքերով, իրենց կուսակցության անդամներն ու պատգամավորի թեկնածուները բռնությունների ու խոչընդոտների չեն հանդիպել, որովհետեւ իրենց կուսակցության քաղաքական դաշտը այն չէ, ինչ ուրիշներինը. «Մեր քաղաքական դաշտը, ընտրազանգվածը այն անձնավորություններն են , որոնք մեր ժողովրդի համար ցանկանում են փոքրիշատե բարելավել ու ինչ-որ հարցեր լուծել: Իշխանամետները իշխանություն պահելու համար իրենց զանգվածն ունեն, ընդդիմությունն էլ հարցեր լուծելու համար ՝ իր զանգվածը: Մենք նրանց չենք խանգարում, իրենք էլ մեզ չեն կարող խանգարել»:
Որ ընտրական շրջանում լարվածություն չառաջանա ու բռնություններ չկիրառվեն՝ կուսակցության փոխնախագահն առաջարկեց միայն օրենքին հետեւել.« Կարիք չկա, որ մի թեւը միասնական շտաբ հայտարարի, մյուս թեւն էլ իրեն հերթին հայտարարի: Միասնական շտաբը մեզ համար եղել է ու մնում է մեկը՝ ընտրական օրենսգիրքը: Միասնական շտաբը կարող է թեթեւակի օգնել, որ ընտրությունները ինչ-որ մի տեղ բարելավվեն, բայց այն սպեղանին չէ, որ վերքը բուժի: Մեր ժողովուրդը պետք է արթնանա, որ ոչ թե 5000 դրամով ձայնը վաճառի, հետո սկսի բողոքել, թե դա ինչու է տեղի ունենում, որ մի կտոր ջեմի ու բլղուրի համար չգնա ձայնը տա: Այլ մեր ժողովուրդը, հասկանալով այս ամենը, ունենա քաղաքական համարձակություն ու գնա ոչ ասի իրեն ստրկացնողներին»:
Կարդացեք նաև
