«Տպավորությունն այնպիսին է, որ ընտրողների սակավությունը տարբեր քաղաքական ուժերի հանդիպումների ժամանակ ինչ-որ չափով պայմանավորված է նրանով, որ հասարակությունը կարծես թե վախեցած է: Իսկ իշխանությունների հանդիպումներին մարդկանց մեծ թիվը պայմանավորված է նրանով, որ նրանց պարզապես բերում են: Այդ կուսակցությունները վարչական ռեսուրս ունեն, կարողանում են շատ մարդ ապահովել և տպավորություն ստեղծել»,- Aravot.am-ի հետ զրույցում գնահատելով քարոզարշավը՝ ասաց Հայաստանի Կոմունիստական կուսակցության (ՀԿԿ) միասնական համամասնական ցուցակի երկրորդ հորիզոնականը զբաղեցնող Վազգեն Սաֆարյանը: Նա վստահեցնում է, որ այսպիսով կուսակցությունների միջև ստեղծվել են անհավասար պայմաններ, այնինչ ավելի ճիշտ կլիներ միջկուսակցական երկխոսությունների հնարավորություն տրվեր, որպեսզի ընտրողները կարողանային ծանոթանալ բոլոր կուսակցությունների ծրագրերին:
Քարոզարշավի ընթացքում բռնությունների կիրառման երևույթների մասին էլ ասաց. «Բռնություններն անթուլատրելի են, երկուստեք պետք է այնպիսի պայմաններ ստեղծել, որ ավելորդ լարվածության տեղիք չտալ»: Պարոն Սաֆարյանը, անդրադառնալով «Ժառանգության» և ՕԵԿ-ի գործողություններին, գտավ որոշ նմանություններ. «Երկուսն էլ ազատական գաղափարախոսության կրողներ են և ըստ էության երկուստեք նույն դաշտում և նույն ընտրազանգվածի վրա են աշխատում»:
Բռնությունների կիրառման մասին Դեմկուսի համամասնական ցուցակի 2-րդ հորիզոնականում գտնվող Արմեն Հովսեփյանն ասաց. «Դատելով այն բանից, թե ինչ համակարգի պայմաններում ենք ապրում, հաշվի առնելով հասարակության բարոյական անկումը, սրանք բնական բաներ են և էլի կլինեն: Այս կուսակցութունների ժխորը, անարժան մարդկանց մեյդան մտնելը, այդ ամենը սրանց հետևանքներն են»:Պարոն Հովսեփյանը նշեց, որ հենց այս համակարգը փոխելու համար էլ դեմոկրատները ցանկանում են մտնել խորհրդարան: Aravot.am-ը հետաքրքրվեց՝ Դեմկուսին թույլ կտա°ն: Ա. Հովսեփյանը պատասխանեց. «Պիտի պայքարենք, որ հասնենք մեր նպատակին: Սխալվելու լիմիտը սպառվել է, այլևս չպետք է սխալվենք»:
Տաթև ՀԱՐՈՒԹՅՈՒՆՅԱՆ
