«Դաշնակցության» պատգամավորի թեկնածու Լիլիթ Գալստյանը այսօր Հրազդան քաղաքում բնակիչներին կոչ արեց մայիսի 6–ին ընտրել նոր Հայաստանը. «Այսօր քաղաքական հարթակ են իջել քաղաքական ուժեր, որոնք փորձում են դարձյալ ստելով, ահաբեկչությամբ, մուրացկանությամբ ու խորամանկությամբ ձեզնից ձայն կորզել եւ փորձում են հավատացնել, որ նրանք ի վիճակի են փոխել ձեր կյանքը, բայց այնքան դառնորեն են փոխել: Այս հինգ տարիների ընթացքում՝ յուրաքանչյուր տարի 50.000 մարդ է լքել Հայաստանը»:
Տիկին Գալստյանը հավաքվածներին պատմեց, որ երկու օր առաջ Երեւանի Մալաթիա-Սեբաստիա համայնքում էին եւ պարզել են, որ այդ ընտրատարածքում մեծամասնական ընտրակարգով առաջադրված պատգամավորի թեկնածուն խանութից խանութ է ընկել ու պարտքերն է փակում. «Ես գիտեմ, որ նույնը նաեւ այստեղ է, որովհետեւ չկա համայնք, որտեղ պարտքացուցակով առեւտուր չեն անում: Մենք գալիս ենք ասելու ոչ, որովհետեւ ոչ մեկի ողորմությունը մեզ պետք չէ»:
Ավելի ուշ տիկին Գալստյանից հետաքրքրվեցինք՝ պատգամավորի ո՞ր թեկնածուն է քաղաքացիների «նիսյա» գնումների հաշիվները փակում, բայց նա դժվարացավ պատասխանել:
Վահան Հովհաննիսյանն էլ շնորհավորեց աշխատավորների օրվա առիթով ու ասաց, թե չարչի առեւտրականներ կան ինչքան ուզես, բայց աշխատավորների թիվը, , պակասել է: Նրա խոսքերով, «Դաշնակցությունը» ոչ ոքից ոչինչ չի պահանջում՝ ոչ հավատալ, ոչ վստահել. «Ասում ենք երեք պարզ բառ՝ ազատություն, արդարություն, դաշնակցություն: Արդարություն չկա ոչ մարզպետարաններում, ոչ քաղաքապետարաններում ոչ դատարաններում, ոչ նախարարություններում: Արդարությունը մեզնից խլել են, բայց այնքան հեշտ է այն վերադարձել: Պարզապես դուք չպետք է վախենաք, որովհետեւ ոչինչ չեն կարող ձեզնից վերցնել, որովհետեւ ինչ հնարավոր էր՝ արդեն խլել են»:
Կարդացեք նաև
Արփինե ՍԻՄՈՆՅԱՆ
