«Ավելի վատ ընտրություն երբեւէ ՀՀ-ում չի եղել: Եկող ընտրությունը միշտ էլ նախորդին գերազանցել է` ընտրախախտումների, զանգվածային կեղծիքների առումով, բայց այս մեկը տարբերվում է եւ սա կոչել ընտրություն, ուղղակի չի կարելի»,- մայիսի 6-ին կայացած խորհրդարանական ընտրություններն այսպես է բնութագրում Սյունիքի թիվ 37 ընտրատարածքում մեծամասնական ընտրակարգով առաջադրված պատգամավորության թեկնածու, Գորիսի նախկին քաղաքապետ Սամվել Հարությունյանը:
Մեր զրուցակիցը վկայակոչում է դեռ ընտրությունների նախապատրաստական ընթացքը, որն ընթացավ ՀՀ Սահմանադրության եւ այլ օրենքների կոպտագույն խախտումներով, մասնավորաբար, ՀՀ-ից տարիներ առաջ արտագաղթած եւ տեւական ժամանակ ՀՀ-ից բացակայող, անգամ այդ ընթացքում ոչ մի անգամ Հայաստան չժամանած եւ վաղուց այլ պետությունների քաղաքացի հանդիսացող հազարավոր մարդկանց անուններն ընդգրկվել էին տարածքի ընտրացուցակներում: «2008 թվականին ՀՀ ԱԺ ընտրություններին մասնակցել են Գորիսի մոտ ութ հազար ընտրողներ, որն այդ տարվա համար եղել է խիստ ուռճացած, ռեկորդային: Վերջին հինգ տարիներին, Գորիս քաղաքում փաստացի բնակվող ընտրողների թիվը պակասել է առնվազն հազարով, մինչդեռ մայիսի 6-ին ընտրությունների մասնակցած ընտրողների թիվը պակասելու փոխարեն, էականորեն «աճել» է եւ դարձել 9775 մարդ: ՀՀ-ից երկար ժամանակ բացակայող Գորիս քաղաքի ավելի քան 3000 բնակիչների փոխարեն ՀՀԿ-ի եւ նրա թեկնածու Հայկ Գրիգորյանի օգտին կատարվել է քվեարկություն: Նույնը կատարվել է Սիսիանում եւ մնացած բնակավայրերում»,- ասում է մեր զրուցակիցը: Նա պարզապես անհնար է համարում այն, որ Սիսիանում ընտրությունների մասնակցել է 7500 մարդ, քանի որ այդքան կամ մի փոքր ավելի շատ բնակիչ ունի Սիսիան քաղաքը:
Այս ընտրությունների արդյունքում Սամվել Հարությունյանի օգտին արձանագրվել է 1492 ձայն: Հիշեցնենք, որ 2007-ին մեր զրուցակիցն ինն անգամ ավելի ձայներ էր արձանագրել: Սույն իրողությունը նա այսպես է բացատրում. «Վստահ եմ, որ բազմապատիկ ավելի ձայն եմ ունեցել, որովհետեւ ավելի քան երբեք, շատ բուռն ընտրարշավ եմ անցկացրել: Համոզված եմ, որ իրական արդյունքներն այլ են: Ինչ մնում է արձանագրված ձայներին` չմոռանանք, որ Գարեգին Նժդեհն իր փայլուն, փառապանծ հաղթանակները կերտել է առավելագույնը 700 հոգով` փրկելով ոչ միայն ներկայիս Սյունիք, այլ ներկային Հայաստանի Հանրապետությունը: Շատերն անգամ զարմացած են, որ այդքան ձայն կարողացել ենք պահել»:
Մեր զրուցակիցը չի պատրաստվում համակերպվել ընտրությունների այս արդյունքների հետ: Սակայն նախատեսվող քայլերի մասին կբարձրաձայնի քիչ ավելի ուշ:
Կարդացեք նաև
Նելլի ԳՐԻԳՈՐՅԱՆ
