«Առավոտի» հուլիսի 18-ի համարում տպագրված «Նախարարը գործել է առանց կառավարության որոշմա՞ն» հրապարակման հաջորդ օրն իսկ տպագրել ենք մշակույթի նախարարության տեսակետը: Հրապարակմանն արձագանքել է նաեւ ՀՀ նկարիչների միության նախագահ Կարեն Աղամյանը: Նրա՝ «Առավոտին» ուղարկված նամակում մասնավորապես կարծիք կա, թե խեղաթյուրված է ներկայացվել գործերի ընթացքը, իրեն էլ վերագրվել են մտքեր, որոնք արատավորում են իր պատիվն ու արժանապատվությունը՝ որպես քաղաքացի, նկարիչ, մշակութային-հասարակական գործիչ։
«Հեռախոսային զրույցից հրապարակման հեղինակը դիտավորյալ հանել է իմ մեկնաբանությունը, որպեսզի տպավորություն ստեղծվի, որ եւ մշակույթի նախարար Հ. Պողոսյանը, եւ ես թույլ ենք տվել ինչ-ինչ ապօրինություններ։ Մասնավորապես՝ հեռախոսային զրույցում ես հայտնել եմ, որ այդ գործերը գնվել են պետության կողմից սիմվոլիկ գներով, եւ դրանց սեփականատերը պետությունն է։ Ճիշտ է, նշել եմ, որ որեւէ պաշտոնական ձեւակերպում չեմ տեսել, ավելացնելով, որ, ըստ էության, պետք է չլիներ որեւէ պաշտոնական փաստաթուղթ նաեւ Նկարիչների միությունում՝ դրանք Արցախի պատկերասրահին հանձնելու մասին, քանի որ այդ նկարների սեփականատերը Նկարիչների միությունը չէ, այլ պետությունն է, հանձինս մշակույթի նախարարության։ Սեփականատերը պարտավոր չէր ինչ-որ թղթեր կազմել՝ Նկարիչների միության առջեւ իր նվիրատվությունը Արցախին հիմնավորելու համար»,- գրել է Աղամյանը:
Նշենք, որ պահպանվել է պարոն Աղամյանի հեռախոսազրույցի ձայնագրությունը, եւ նրան ոչինչ չի վերագրվել: Հոդվածում նշված էր, որ Եղեռնի 95-ամյա տարելիցին նվիրված ցուցահանդես-մրցույթից հետո պետության գումարով գնված նկարները ոչ մի թանգարան չի ցանկացել ընդունել, դրանք ժամանակավորապես ի պահ են տրվել ՀՀ նկարիչների միությանը, ապա «մեկնել» Ստեփանակերտի նորաբաց պատկերասրահ՝ առանց կառավարության համապատասխան որոշման:
«Առավոտի» հետ զրույցում պարոն Կարեն Աղամյանը հաստատել էր, որ որեւէ պաշտոնական թուղթ չի եղել գործարքի համար: Հոդվածում տող անգամ չկա, թե նկարները Նկարիչների միության սեփականությունն են: Ուրեմն էլ ինչի՞ց է նեղացել պարոն Աղամյանը:
Կարդացեք նաև
Սեփ. լր.
«Առավոտ» օրաթերթ
