Կապանում սեպտեմբերի 9-ին կայանալիք քաղաքապետի ընտրության համար առաջադրվել է 4 թեկնածու` գործող քաղաքապետ, ՀՅԴ անդամ Արտուր Աթայանը, նախկին քաղաքապետ, «Զանգեզուրի պղնձամոլիբդենային կոմբինատ» ՓԲԸ գլխավոր մասնագետ, անկուսակցական Գագիկ Աթաջանյանը, անհատ ձեռնարկատեր, կրկին անկուսակցական Վարդան Բաբայանը եւ ՀՀԿ անդամ, «Հայփոստ» ՓԲԸ «Կապանի փոստային» մասնաճյուղի տնօրեն Աշոտ Հայրապետյանը:
Մեծ թիվ է կազմում հատկապես համայնքի ավագանու համար առաջադրված թեկնածուների քանակը, որտեղ թեժ մրցակցություն է սպասվում: 15 հոգանոց ավագանու համար առաջադրվել է 56 թեկնածու, որից 4-ը` կին է: Առաջադրված 56 թեկնածուներից 33-ն անկուսակցական են, կուսակցական մնացած 23 թեկնածուներից 4-ը ԲՀԿ անդամ է, նույնքան թեկնածու ՀՅԴ-ից է, մեկական թեկնածուներ ՕԵԿ եւ «Ժառանգություն» կուսակցությունների ներկայացուցիչներ են, իսկ մյուս 13-ը` հանրապետական է:
Սյունիքի մարզի քաղաքներից ամենաշատ թվով քաղաքապետի թեկնածուներ են առաջադրվել Սիսիան քաղաքում: Այստեղ առաջադրված թեկնածուների թիվը հասնում է 5-ի: Քաղաքապետի պաշտոնի համար կպայքարեն գործող քաղաքապետ, ԲՀԿ անդամ Աղասի Հակոբջանյանը, ՀՅԴ անդամ Տիգրան Պողոսյանը (չի աշխատում), Մհեր Ազոյանը (մենատնտես), անկուսակցականներ Գեւորգ Բագյանը (քաղաքապետարանում` տնտեսվար) եւ Հրաչիկ Խաչատրյանը (չի աշխատում): Քաղաքապետի համար 2-ական թեկնածուներ էլ առաջադրվել են մարզի մյուս քաղաքներում` Ագարակում, Մեղրիում, Քաջարանում եւ Դաստակերտում: Իսկ Գորիսում սեպտեմբերի 9-ին կկայանա միայն համայնքի ավագանու ընտրություն, որին մասնակցելու համար առաջադրվել է 25 թեկնածու, այդ թվում` մեկ կին թեկնածու: Ավագանու անդամի համար առաջադրված 25 թեկնածուներից պետք է ընտրվի միայն 15-ը:
Մերի ՍՈՂՈՄՈՆՅԱՆ
Կարդացեք նաև
