Հանրապետության բնակարանային ֆոնդի ֆիզիկական և բարոյական մաշվածության գույքագրման եղանակով հաշվառման ծրագրի հետ կապված խնդիրները քննարկելու նպատակով, ՀՀ քաղաքաշինության նախարար Սամվել Թադևոսյանը օգոստոսի 20-ին ընդունեց Համաշխարհային բանկի Հայաստանի գրասենյակի ծրագրերի ավագ պատասխանատու Նաիրա Մելքումյանին:
Նախարար Սամվել Թադևոսյանը, կարևորելով ծրագրի իրագործումը, նշեց, որ այն հստակ պատկերացում կտա վթարավտանգ շենքերի քանակի, դրանց վթարայնության աստիճանի, սեյսմիկ անվտանգության գնահատականի, կապիտալ և ընթացիկ նորոգումների անհրաժեշտության մասին, ինչպես նաև կբարձրացնի առկա բնակարանային ֆոնդի կառավարման արդյունավետությունը: Պարոն Թադևոսյանն ընդգծեց, որ ծրագրի իրագործումը նախատեսվում է մեկնարկել դպրոցների կառավարման արդյունավետության բարձրացմանն ուղղված նախագծերով:
Իր հերթին, ՀԲ ծրագրերի ավագ պատասխանատու Ն. Մելքումյանը կարևորեց ծրագրի իրագործումը` նշելով, որ ՀԲ-ում լավատեղյակ են մեր հանրապետության շենքերի սեյսմակայունության և տեխնիկական վիճակի հետ կապված խնդիրներին: Տիկին Մելքումյանը, հույս հայտնեց, որ ծրագրի իրագործման համար կփորձեն գտնել միջոցներ, ինչպես Համաշխարհային բանկի, այնպես էլ այլ դոնոր կազմակերպությունների միջոցներից:
ՀՀ քաղաքաշինության նախարարություն
