Նոյեմբերի 13-ին Տավուշի մարզի Իջեւանի տարածաշրջանի Գետահովիտ գյուղի մշակույթի տանը «Խաչաղբյուր 2» ՓՀԷԿ-ի շինարարությունն իրականացնող «ՄեգաԷներջի» ընկերության ղեկավարությունը Գետահովիտի մի խումբ բնակիչների հետ քննարկել է ՀԷԿ-ի շինարարությունը շարունակելու հարցը:
ՀԷԿ-ի շինարարությունը կասեցվել է այն բանից հետո, երբ Գետահովիտ համայնքի բնակիչները և մի շարք բնապահպանական կազմակերպություններ, հասարակական ակտիվիստներ բողոք էին ներկայացրել բնապահպանության նախարարությանը` ՀԷԿ-ի շինարարության ընթացքում թույլ տրված օրինախախտումների վերաբերյալ: Կատարված ուսումնասիրությունների արդյունքում ՀՀ բնապահպանության նախարար Արամ Հարությունյանի 2012 թվականի հոկտեմբերի 26-ի հրամանով չեղյալ է համարվել շրջակա միջավայրի վրա ազդեցության փորձաքննության 2012 թվականի օգոստոսի 23-ի թիվ ԲՓ 70 փորձագիտական եզրակացությունը: Նշենք, որ «Խաչաղբյուր 2» ՓՀԷԿ-ի շինարարության թույլտվությունը տվել էր Ենոքավան համայնքի ղեկավարը, սակայն շինարարությունը իրականցվում էր Գետահովիտ համայնքի վարչական տարածքում: Նախքան շինարարությունը սկսելը Գետահովիտ համայնքում հանրային լսումներ չէին իրականացվել: Գյուղապետի տեղակալի խոսքերով` «Խաչաղբյուր-2» փոքր հիդրոէլեկտրակայանի շինարարության նպատակահարմարության հարցը կարող է որոշել միայն Գետահովիտ համայնքի բնակչությունը, որ իրենք մտածում են այս հարցի կապակցությամբ գյուղում հանրաքվե անցկացնել:
Ոսկան ՍԱՐԳՍՅԱՆ
