Հրանտ Մաթեւոսյանի բացառիկ հարցազրույցը եւ Կարեն Գևորգյանի կորսված ֆիլմը` «Հրապարակ նկուղ» գրքում
Այսօր «ՆՓԱԿ» նորարար փորձարարական արվեստի կենտրոնում տեղի ունեցավ «Եվրասիա համագործակցություն» հիմնադրամի տնօրեն, ՍՄԻԼ հիմնադրամի հոգաբարձուների խորհրդի անդամ, խաղաղության և կոնֆլիկտների փոխակերպման փորձագետ Գևորգ Տեր-Գաբրիելյանի «Հրապարակ նկուղ» գրքի շնորհանդեսը:
Aravot.am-ի հետ զրույցում հեղինակը նշեց, որ գիրքն ընդգրկում է այն նյութերը, որոնք գրել է 16-28 տարեկանում. «Դրանք մասամբ տպագրվել են հայկական մամուլում` Հայաստանի անկախացումից հետո: 1993-ին ես գնացի Հայաստանից եւ 14 տարի բնակվեցի արտասահմանում: Երբ վերադարձա, նյութերը գտա նկուղում, թվայնացրեցի եւ մեծ թիմի աջակցությամբ ստեղծվեց գիրքը, որն ինչ որ առումով այն ժամանակների հուշարձան է: Գրքում տեղ են գտել պատմվածքներ, էսսեներ, գրականագիտական հոդվածներ: Իսկ կինոյի մասին հոդվածներից մեկը կինոռեժիսոր Կարեն Գևորգյանի մասին է, մյուսը` Ռոման Բալայանի ֆիլմերից մեկի»:
Կարդացեք նաև
Գրքում զետեղված նյութերից Գևորգ Տեր-Գաբրիելյանն առանձնացրեց Հրանտ Մաթեւոսյանի հետ հարցազրույցը, որը վերջնական տեսքի է բերվել գրեթե մեկ տարվա ընթացքում. «Այն երբեւէ չի հրատարակվել: Հրանտ Մաթևոսյանն ինձ ասաց, թե չի ուզում, որ ես նրա խոսքը ուղղակիորեն կրկնեմ եւ խնդրեց ուրիշ ձեւ գտնել: Փաստորեն, հարցազրույցը շարադրելու նոր ձեւ պետք է գտնեի, ինչը դժվար էր, սակայն ես արեցի դա: Մաթեւոսյսնը դրական էր տրամադրված, թեեւ ես ութ տարբերակ էի առաջարկել նրան: Առաջին տարբերակներն անելուց նա ասում էր` «դուրս գրի այն միտքը, որը դուրդ եկել է եւ այն նախադասությունը, որը գրելիս ձեռագիրդ դուրդ գալիս է»: Այդպես ես հասկանում էի, որ դեռ շատ անելիք կա… Իսկ վերջում նա ինձ ասաց, թե խմբագրությունից ասում են, որ լավ նյութ եմ ներկայացրել, թեեւ նա կարդացել էր նախապես»:
Մեր զրուցակցի խոսքով. «Գրքի շնորհիվ փրկվեց «այն ժամանակվա» արտադրանքը: Այսօր հանրությանը կարող եմ դրա մի բեկորը ներկայացնել, որովհետեւ շատ բան է կորսված, օրինակ` Կարեն Գևորգյանի «Հրաժեշտ եզրագծից անդին» ֆիլմը, որի մասին գրել եմ հոդված եւ վիպակ: Ինձ համար տարօրինակ էր, որովհետեւ վերջերս սերիալ ստեղծվեց, որը կոչվում էր «Եզրագծից այն կողմ»: Այսինքն, ձեւակերպումն «օդի մեջ» է եղել, կամ ինչ-որ մեկը տեղյակ է եղել այդ ֆիլմի վերնագրից: Սակայն Գևորգյանի ֆիլմը չկա, որովհետեւ արգելվեց, անգամ վերջնական տեսքի չբերվեց: Իմ վիպակը եւ հոդվածը գուցե ինչ-որ չափով օգնեն մարդկանց պատկերացում կազմել կորսված ֆիլմի մասին: Այսինքն` ամենամեծ ձեռքբերումը կորսվելիքը փրկելն է»:
Հավելենք, որ գիրքը լույս է տեսել «Սոցիալ-մշակութային ինովացիաների լաբորատորիա» (ՍՄԻԼ) հիմնադրամի աջակցությամբ:
Լուիզա ՍՈՒՔԻԱՍՅԱՆ
