«Սազական է, որ վարձով ենք ապրում, երբ նախագահական նստավայրը մերն է, ԱԺ նստավայրն էլ է մերը: Սա գալիս է ասելու, որ ավագանու ընտրությունները կրելու են ձևական բնույթ»,-այսօր «Իրատես դե ֆակտո» մամուլի ակումբում հայտարարեց ՀԿԿ կենտկոմի առաջին քարտուղար Ռուբեն Թովմասյանը:
Անդրադառնալով իրենց կուսակցության՝ Երևանի ավագանու ընտրություններին չմասնակցելու փաստին, նա այսպես պատճառաբանեց. «Լինելու է ոչ թե գաղափարների, պատմության մեջ թողած հետքերի, ապագայում անելիքների գնահատում, այլ դրվում է այն հարցը, ով ինչ անելու հնարավորություն ունի: Իսկ եթե մասնակցեինք, մեր ծրագրային առաջին հարցը լինելու էր մաքրել Օպերայի շրջապատը, Գլխավոր պողոտան, բոլոր ջրավազանները գործարկել»:
Ռ. Թովմասյանը կարծում է, որ ընտրություններով համակարգ չես փոխի ու մանրամասնում. «Կյանքում միշտ գաղափարախոսությունն է հաղթել իր տարբեր մեթոդներով: Եկել ենք այն եզրակացության, որ բանվորի ուժով, գյուղացու ճնշմամբ միայն կարելի է համակարգ փոխել: Ուրիշ ճանապարհ դեռ չկա»:
Քաղաքական իրավիճակը Ռ. Թովմասյանը համարում է անհավասարաչափ ու նշում. «Ստեղծվել է անհավասար իրավիճակ կուսակցությունների միջև: Կան սիրելու կուսակցություններ, բովանդակություն ունեցողներ, բայց դրանք ուրիշ ուղղվածության վրա են տարվում»:
Կարդացեք նաև
Ռ. Թովմասյանը Ր. Հովհաննիսյանի քայլերը սխալ է գնահատում և մանրամասնում. «Ես այցելել եմ Րաֆֆիին, իրենք խորհուրդ եմ տվել, որ հետևի իր առողջությանը, հանկարծ՝ ժողովրդի արյուն չթափվի, քանի որ ունենք խայտառակ էջեր՝ մարտի 1, հոկտեմբերի 27: Իմ կարծիքով՝ Րաֆֆին սխալ ճանապարհի վրա է: Համաշխարհային երևույթներ կան, որոնք ՀՀ-ուը վարկաբեկվում են: Օրինակ՝ հեղինակազրկվեց հացադուլը ու ես զարմանում եմ, որ հացադուլով գնացող մարդիկ նրանից չեն նեղանում: Վարկաբեկվեց, քանի որ իր արդյունքները չտվեց: Իսկ հացադուլը ունի երկու նպատակ՝ կամ կյանքդ, կամ սկզբունքները»:
Ր. Հովհաննիսյանի քայլերին անդրադառնալով Ռ. Թովմասյանը խորհուրդ տվեց. «Եթե ներուժ չունես, մինչև թռնելդ հոպ մի ասա»:
Ընկեր Թովմասյանը խոսեց այն մասին, որ արդեն ընտրակաշառքներ են առաջարկում ու նշեց, թե եթե իրե դուռը թակեն ինքն ինչ է ասելու. «Որ մեր տան դուռը ծեծեն, կասեմ ես Ձեր…»:
Տաթև ՀԱՐՈՒԹՅՈՒՆՅԱՆ
