Երեկ գիշեր, ժամը երկուսի սահմաններում, անհայտ անձինք քարերով կոտրել են Ժուռնալիստների «Ասպարեզ» ակումբի խորհրդի նախագահ Լեւոն Բարսեղյանի ավտոմեքենայի դուռն ու ապակին, գողացել որոշ իրեր:
Այս մասին Aravot.am-ի հետ զրույցում ասաց հենց ինքը՝ Լեւոն Բարսեղյանը, հայտնելով, որ իր ավտոմեքենայից պոկած սարքավորումներից բացի, գողացել են նաեւ երկու էլեկտրոնային կրիչ, որոնցից մեկի մեջ փաստաթղթեր են եղել, մյուսի մեջ՝ երաժշտություն:
Թե ինչու են քարով կոտրել ավտոմեքենան, Բարսեղյանը չի հասկանում: Ըստ նրա՝ «Սենց գործի գնալուց առաջ պլանավորած գործիքներ են տանում»: Բարսեղյանը նաեւ նշեց, որ իրեն 3-4 հազար ԱՄՆ դոլարի վնաս են հասցրել եւ չնայած կասկածներ չունի, չգիտի, թե ինչով է պայմանավորված այս արարքը, համենայնդեպս՝ «փնթի կողոպուտ է եղել»:
Բարսեղյանն ասաց, որ ավտոմեքենան ավտոտնակում չի եղել, առավոտյան է հայտնաբերել կատարվածը:
Կարդացեք նաև
Ոստիկանությունն արդեն քրեական գործ է հարուցել, բայց Բարսեղյանը թերահավատորեն է վերաբերվում, քանի որ՝ «վերջին տարիներին սա ակումբի եւ մեր գույքի նկատմամբ կատարված 8-րդ հարձակումն է, որոնցից ոչ մեկը մինչեւ այժմ չի բացահայտվել, իսկ եթե գոնե այս մեկը բացահայտեն, ես իրավապահներից ներողություն կխնդրեմ»:
Եվա ՀԱԿՈԲՅԱՆ
Ահա և դեպի ավելի ապահով Հայաստան: