Այսօր Երեւանում են ԵԱՀԿ Մինսկի խմբի համանախագաներ՝ Իեն Քելլին (ԱՄՆ), Ժակ Ֆորը (Ֆրանսիա) եւ Իգոր Պոպովը (Ռուսաստան):
Համանախագահներին արդեն ընդունել են Հայաստանի նախագահ Սերժ Սարգսյանը եւ ԱԳ նախարար Էդվար Նալբանդյանը:
Ռուսաստանցի համանախագահ Իգոր Պոպովը «Ազատություն» ռադիոկայանի հետ զրույցում ասել է, որ աշխատանք է տարվում առաջիկայում Հայաստանի եւ Ադրբեջանի նախագահների հանդիպում կազմակերպելու համար:
«Երկու երկրների արտաքին գործերի նախարարները աշխատում են նախագահների հանդիպումը կազմակերպելու ուղղությամբ: Գիտեք, որ Փարիզում բանակցություններ տեղի ունեցան, հանդիպեցինք Կրակովում. այս ողջ աշխատանքն ուղղված է նրան, որպեսզի հինք ստեղծվի նախագահների հանդիպման համար: Դեռեւս, սակայն, հանդիպման մասին պայմանավորվածություն չկա», – ասել է ռուսաստանցի համանախագահը:
Կարդացեք նաև
Մեկնաբանելով այս շաբաթ ավելի վաղ Մոսկվայում իր ադրբեջանցի գործընկեր Էլմար Մամեդյարովի հետ հանդիպումից հետո համատեղ մամուլի ասուլիսում Ռուսաստանի արտգործնախարար Սերգեյ Լավրովի հայտարարությունը ստատուս քվոյի անընդունելիության եւ գրավյալ տարածքները վերադարձնելու մասին` Պոպովը նշել է. – «Լավրովն այդպիսի բան չի ասել: Ռուսաստանի արտգործնախարարն ասել է, որ ստատուս քվոն ձեռնտեւ չէ ոչ մեկին` ո’չ Ադրբեջանին, ո’չ համանախագահող երկրներին, ո’չ Հայաստանին` հաշվի առնելով տնտեսական շրջափակումը: Ձեռնտու չէ նաեւ Լեռնային Ղարաբաղին: Մենք ելնում ենք նրանից, որ բանակցային գործընթացում պետք է տեղաշարժ լինի, եւ այդ տեղաշարժի արդյունքում ի վերջո պետք է ստորագրվի խաղաղության պայմանագիր: Սրա մասին է խոսքը»:
Լավրովը, հիշեցնենք, ասել էր. – «Ստատուս քվոն, անշուշտ, անընդունելի է, ընդ որում` բոլորի համար: Առաջին հերթին` Ադրբեջանի, Հայաստանի եւ Լեռնային Ղարաբաղում ապրողների համար, ես դրանում խորապես համոզված եմ: Ստատուս քվոն նշանակում է ոչ միայն ադրբեջանական տարածքների վերադարձի հարցի լուծված չլինելը, այլեւ` Հայաստանի տնտեսական շրջափակումը, այդ պատճառով այստեղ պետք չէ որեւէ մեկին համոզել այդ ստասուսի անընդունելիության հարցում»:
Ռուսաստանցի համանախագահը հավելեց, որ հակամարտության կարգավորման` այսօր քննարկվող վեց կետերը ներառում են ե’ւ տարածքների վերադարձի, ե’ւ Լեռնային Ղարաբաղի վերջանական կարգավիճակի հարցերը:
