Ռուսաստանի գիտությունների ակադեմիայի՝ ՌԳԱ Արեւելագիտության ինստիտուտի Կենտրոնական Ասիայի, Կովկասի եւ Ուրալո-Պովոլժիեի հետազոտությունների կենտրոնի աշխատանքային խմբի համակարգող Ալեքսանդր Սկակովը «Առավոտ»-ի հետ զրույցում խոսելով Ռուսաստանի կողմից Հայաստանի եւ հետխորհրդային երկրների նկատմամբ վարվող քաղաքականության, ճնշումների մասին՝ կապված այդ երկրների եւ ԵՄ-ի հետ հարաբերությունների խորացման ծրագրերի հետ, կարծիք հայտնեց, թե Հարավային Կովկասի երկրները, Ռուսաստանը, Ուկրաինան, Բելառուսը եւ Մոլդովան պետք է հանդես գան միասնական տարածքում, եւ թե ինչպես այդ կառույցը կկոչվի՝ կարեւոր չէ:
«Ես մրցակցություն չեմ տեսնում, ավելի ճիշտ կլիներ դա մրցակցություն համարել ոչ թե մոտեցումների եւ ծրագրերի միջեւ, այլ մրցակցություն խոսակցությունների եւ խոստումների միջեւ: Հետեւաբար չեմ կարծում, թե Ռուսաստանի կողմից ճնշումներ են գործադրվում Հայաստանի նկատմամբ, որպեսզի նա հետ կանգնի ինչ-որ քայլերից: Չեմ կարծում, թե դա տեղի է ունենում», նկատեց Ալեքսանդր Սկակովը:
Այնուհետեւ մեր զրուցակիցը հավելեց․ «Եթե դիտարկենք գազի սակագների բարձրացման հարցը, ապա շատ հաճախ Ռուսաստանի գործողությունները մենաշնորհների դեպքում, այդ թվում՝ «Գազպրոմի», դրանք շատ վատ են փոխկապակցված Ռուսաստանի քաղաքական, ազգային շահերի հետ, այսինքն՝ «Գազպրոմի» ազգային շահը շատ հաճախ ավելի կարեւոր է, քան՝ Ռուսաստանի ազգային շահը, ցավոք: Այդ իսկ պատճառով, գազի սակագնի շուրջ գործընթացն էլ չէի կապի Հայաստանի՝ ԵՄ Ասոցացման համաձայնագրի ընդունման կամ չընդունման հետ, այդ խոսակցություններին, առհասարակ, լուրջ չէի վերաբերվի»:
Կարդացեք նաև
ՌԳԱ Արեւելագիտության ինստիտուտի Կենտրոնական Ասիայի, Կովկասի եւ Ուրալո-Պովոլժիեի հետազոտությունների կենտրոնի աշխատանքային խմբի համակարգող Ալեքսանդր Սկակովի հետ հարցազրույցն ամբողջությամբ կարող եք կարդալ վաղվա տպագիր «Առավոտ»-ում:
Էմմա ԳԱԲՐԻԵԼՅԱՆ
