Վահե Հակոբյանին Սյունիքի մարզպետ նշանակելուց հետո թիվ 38 ընտրատարածքում Ազգային ժողովի պատգամավորի թափուր տեղը լրացնելու համար սեպտեմբերի 30-ին տեղի կունենան Աժ մեծամասնական ընտրակարգով լրացուցիչ ընտրություններ, ինչի համար կառավարությունը վաղը որոշում կկայացնի գումար հատկացնել:
Ըստ կառավարության կայքէջի՝ լրացուցիչ ընտրությունները կազմակերպելու համար կենտրոնական ընտրական հանձնաժողովին կհատկացվի 50 միլիոն 384 հազար 846 դրամ` կառավարության պահուստային ֆոնդի հաշվին, իսկ ՀՀ ոստիկանությանն էլ կհատկացվի 5 միլիոն 133 հազար 219 դրամ:
Նշենք, որ Զանգեզուրի պղնձամոլիբդենային կոմբինատի սեփականատեր Մաքսիմ Հակոբյանի որդու` Վահե Հակոբյանի փոխարեն թիվ 38 ընտրատարածքում պատգամավոր է հավակնում դառնալ նորանշանակ մարզպետի հորեղբոր որդին` Առնոլդ Հակոբյանը. օրերս մամուլում նման լուրեր էին շրջանառվում: Ըստ նույն աղբյուրի, թեեւ Մաքսիմ Հակոբյանն ասել էր`«Սուտ-սուտ» բաների մասին ինձ մի հարցրեք»,-սակայն հենց հայր եւ որդի Հակոբյանների ցանկությունն է իրենց բարեկամին պատգամավոր դարձնելը:
Հնարավոր է այդ ընտրատարածքում ՀՅԴ-ն էլ Կապանի նախկին քաղաքապետ Արթուր Աթայանի թեկնածությունն առաջադրի, իսկ «Ժառանգության» թեկնածուն կարող է լինի Զարուհի Փոստանջյանը:
Նելլի ԲԱԲԱՅԱՆ
