Այսօր «Հայելի» ակումբում Փոխադրողների միության նախագահ Հրանտ Եղիազարյանը հայտարարեց, որ Երեւանում ուղեվարձը պետք է դառնա 250 դրամ:
Ըստ նրա` «Առայժմ աշխատում ենք հարյուր դրամով, մինչեւ որ հիմնավոր փաստաթուղթ կլինի գնի բարձրացման մասին: Եթե 250 ավտոբուս ենք նվեր ստացել, դա դեռ չի նշանակում, որ պետք է երթեւեկենք 50 դրամով, այլ պետք է այնպես անենք, որ այդ 250 -ը դառնա 300 հատ եւ ավել: Առաջարկում ենք, որ ուղեվարձը դառնա 250 դրամ: Վերջին անգամ ուղեվարձի թանկացում եղել է 96 թվականին, դրանից հետո կյանքը թանկացել է, իսկ այս ոլորտի եկամուտները չեն ավելացել»: Եղիազարյանը նշեց, որ առաջարկ են ներկայացրել այն մասին, որ ավտոբուսը դառնա 250` իսկ միկրոավտոբուսը` 200 դրամ:
«Քաղաքապետարանի փաստաթուղթ է ընկել իմ ձեռքը, որը մեզանից թաքցնում էին, իրենց հաշվարկներով միկրոավտոբուսը պետք է դառնար 202 դրամ: Իսկ մեզ ասացին 150 դրամի հաշվարկ կատարեք, մենք էլ` գոտիները մի կերպ ձգելով այդպես էլ արեցինք, դրանից պակաս հնարավոր չէ»,- հավելեց նա:
