Սիրելի´ ուսանողներ, Հայաստանի երիտասարդական հիմնադրամի անունից ի սրտե շնորհավորում եմ Ուսանողության միջազգային օրվա առթիվ։
Մեր ժամանակները փոփոխություններով լի են։ Ուզենք, թե չուզենք, դրանք ծառանում են մեր առջև, պարտադրում իրենց խաղի կանոնները։ Այդ փոփոխություններին համընթաց գնալու և մարտահրավերները պատվով ընդունելու համար նոր մտածողությամբ մարդիկ են անհրաժեշտ՝ արագ կողմնորոշվող, չվախեցող, առանց կաղապարային մտածողության։
Ուսանողներն ու երիտասարդները հենց նրանք են, ովքեր ունեն փոփոխություններին ընդառաջ գնալու ավյուն։ Մենք ունենք երիտասարդների հսկայական բանակ, ովքեր կարող են փոխել աշխարհը, ովքեր չեն վախենում սրբագրումներ մտցնել ներկայում։
Առավել քան վստահ եմ, որ ընդամենը մի քանի տարի անց այսօրվա ուսանողների շնորհիվ մենք ունենալու ենք որակապես շատ ավելի լավ Հայաստան։
Կարդացեք նաև
Սիրելի´ ուսանողներ, մեր ապագան դուք եք։ Ձեզանից յուրաքանչյուրի այսօրվա ձեռքբերումները մեր վաղվա հաջողության գրավականն են։ Մաղթանքս է, որպեսզի ամենայն պատասխանատվությամբ վերաբերվեք ապագան կերտելու ձեր առաքելությանը։ Դուք եք ձեր ուսերին տանելու բոլոր դժվարությունները։ Ուստի որքան շատ սովորեք ու տքնեք այսօր, այնքան այդ դժվարությունն ավելի տանելի ու դյուրին կլինի։
Կարեն Ավագյան
Հայաստանի երիտասարդական հիմնադրամի հոգաբարձուների խորհրդի համակարգող
