Կոտայքի մարզի N 28 ընտրատարածքային ընտրական հանձնաժողովը հրապարակել է Արզնի համայնքում մեծամասնական ընտրակարգով կայացած համայնքի ավագանու ընտրությունների արդյունքների նախնական արձանագրությունը։ Ավագանու 7 մանդատի համար առաջադրվել էր 17 թեկնածու։ Սեպտեմբերի 27-ին կայացած տեղական ինքնակառավարման մարմինների ընտրություններից՝ 4 համայնքից միայն Արզնիում է, որ մրցակցություն կար։ 1978 ընտրողից քվեարկությանը մասնակցել է 894-ը։
Հետաքրքիր է, որ Արզնի համայնքի գործող ավագանու բոլոր 7 անդամներն այս անգամ նույնպես առաջադրվել էին։
Ըստ նախնական արձանագրության, նախկիններից միայն ընտրվել է ատամնաբույժ, 36-ամյա Դավիթ Վանյանը։ Նրա օգտին քվեարկել է 93 ընտրող։ Այդքան կողմ քվե է ստացել նաեւ «Գազպրոմ Արմենիա»-ի հսկիչ, 31-ամյա Գեւորկ Նազարյանը։
Ամենաշատ կողմ ձայները՝ 112 քվե ստացել է «Ակբա բանկում» խորհրդատու աշխատող, 31-ամյա Էմիլ Իվանովը։ «Հայէլցանցեր» ընկերության տեղամասի պետ, 46-ամյա Ռաֆայել Միրզոյանը ստացել է 80 ձայն, «Գազպրոմ Արմենիա»-ի չափագետ 55-ամյա Գագիկ Ավետյանը ստացել է 64, անշարժ գույքի գործակալ, 27-ամյա Ասսար Միխայելովը 61 կողմ ձայներ։ Ավագանու անդամներից միակ չաշխատողը 34-ամյա Սարգիս Պողոսյանն է, որի օգտին քվեարկել է 59 ընտրող։
Կարդացեք նաև
Նկատենք, որ 17 առաջադրված թեկնածուներից միայն մեկն է կին՝ 70-ամյա Սուսաննա Ալեքսանովնան, որը 42 կողմ ձայնով դուրս է մնացել ընտրապայքարից։ Վերջինս գործող ավագանու անդամ է։
Արմեն ԴԱՎԹՅԱՆ
Լուսանկարը՝ Արզնիի համայնքապետարանի ֆեյսբուքյան էջից
