«Ռուսերենը Մաքսային միության աշխատանքային լեզու չի կարող լինել, այն հակասում է Հայաստանի Սահմանադրությանը»,- ասաց «Ժառանգություն» կուսակցության քարտուղար Ստյոպա Սաֆարյանը՝ «Aravot.am»-ի հետ զրույցի ընթացքում:
Հիշեցնենք, որ ըստ «Ազատություն» ռադիոկայանի, Ռուսաստանի Պետդումայի ԱՊՀ-ի, եվրասիական ինտեգրացման և հայրենակիցների հետ կապերի հարցերով հանձնաժողովի նախագահ Լեոնիդ Սլուցկին կարծիք էր հայտնել, որ «Եվրասիական միությունում ռուսաց լեզուն պետք է դառնա, եթե ոչ բարձր կարգավիճակի, առնվազն տեխնիկական կարգավիճակի լեզու, որովհետև բոլոր փաստաթղթերը, տնտեսական պայմանագրերը կլինեն ռուսերենով, և Բելառուսն ու Ղազախստանը դա ընդունել են»:
«Ռուսերենը չի կարող որեւէ կարգավիճակ ունենալ Հայաստանում, որովհետեւ Հայաստանի Սահմանադրությունը նման բան չի նախատեսում: Ռուսերենը որպես աշխատանքային լեզվի կարգավիճակ պետական մարմիններում նշանակում է ՝ փաստաթղթերի պատրաստման լեզուն է լինելու, ինչը հնարավոր չէ ու հակասահմանադրական է: Ռուսական կողմի արած հայտարարություններով Հայաստանի Սահմանադրության արգելքները չեն վերանում, Հայաստանի իշխանությունները չեն կարող պատուհան բացել Հայաստանի ինքնիշխանության եւ լեզվի դեմ նման ոտնձգություններ իրականացնելու համար»,- ասաց պարոն Սաֆարյանը:
Նրա խոսքով, «Եթե անգամ հավատանք, ցավալի մղձավանջին, որ Հայաստանը Մաքսային միության անդամ է, ապա Մաքսային միությունը պարտավոր է Հայաստանի համար ապահովել բոլոր փաստաթղթերի հայերեն թարգմանությունները եւ այդ փաստաթղթերը կարող են օրինական ուժ ստանալ, միայն այն դեպքում, եթե հայերեն թարգմանված են ու հայերեն են գործում: Մաքսային միությունը լավ կանի նայի Եվրամիության փորձին, որտեղ որեւէ մեկը չի վիրավորում այլ ազգերի ինքնությունը: Ռուսաստանը 150 միլիոնանոց երկիր է եւ տվյալ դեպքում այնտեղ պետք է ինտենսիվ սկսեն սովորել հայերեն, եւ հենց ռուս մասնագետները ապահովեն փաստաթղթերի հայերեն թարգմանությունը»:
Կարդացեք նաև
Անդրադառնալով ՌԴ Դաշնային խորհրդի խոսնակ Վալենտինա Մատվիենկոյի հայտարարությանը, թե ռուսերենը պետք է ամրապնդվի Եվրասիական տարածքում եւ բավականաչափ թվով ռուսերենի ուսուցիչներ պետք է պատրաստվեն, ասաց. «Մատվիենկոն անցած տարի ժամանեց Երեւան եւ խորհրդավոր հանգամանքներում հանդիպեց Սերժ Սարգսյանի, վարչապետի, ԿԳ նախարարի հետ, խոսել են նաեւ այդ թեմայով եւ Հայաստանի այս ղեկավարության մասնակից դարձել հայոց լեզվի դեմ ոտնձգությանը: Նրանք դավադիր համաձայնություն են ձեռք բերել ՀՀ իշխանությունների հետ եւ այսօր փորձում են իրականացնել, ինչը թույլ չենք տալու»:
Արփինե ՍԻՄՈՆՅԱՆ
այ որ մաքսատունտունիկ չխաղանք, այլ լեզուների խնդիր էլ չի առաջանա…