Տնտեսական մրցակցության պաշտպանության պետական հանձնաժողովը (ՏՄՊՊՀ) սկսել է ամենօրյա մոնիթորինգ իրականացնել այն շուկաներում, որտեղ կան գերիշխող դիրք զբաղեցնող ընկերություններ, ինչպես նաեւ` սոցիալական նշանակության ապրանքներ` ձու, կաթնամթերք եւ այլն: Այս մասին այսօր կառավարության նիստից հետո ճեպազրույցում ասաց հանձնաժողովի նախագահ Արտակ Շաբոյանը՝ պատասխանելով լրագրողների այն հարցին, թե ամանորյա թանկացումներին արդյոք հետեւո՞ւմ է հանձնաժողովը:
Պարոն Շաբոյանի ներկայացմամբ` հանձնաժողովը չի կարող հսկողություն իրականացնել այն շուկաներում, որտեղ, իր իսկ ձեւակերպմամբ` հարյուրավոր տնտեսվարողներ կան եւ դաշտը մրցակցային է:
ՏՄՊՊՀ ղեկավարը խոստացավ, որ այն շուկաներում, որտեղ իրենք մոնիթորինգ են իրականացնում, հետեւում են գնագոյացմանն ու գների քաղաքականությանը, եթե լինեն չարաշահումներ, ապա հանձնաժողովը պատասխանատվության կենթարկի խախտում կատարած տնտեսվարող սուբյեկտին:
Նելլի ԲԱԲԱՅԱՆ
