«Հայոց Աշխարհ»-ի հետ զրույցում Գառնիի գյուղապետ Աշոտ Վարդանյանը հիշատակեց, որ ինքն անձամբ, ինչպեսեւ գառնեցիները, կտրականապես դեմ են սրճարան կառուցելու նախագծին, քանի որ հուշարձանի տարածքը հատուկ պահպանվող է, ուստի այդ վայրում չի թույլատրվում լրացուցիչ ու մանավանդ բիզնես նպատակներով որեւէ ծրագիր իրագործել:
«Հողային օրենսգրքի համաձայն` հասարակական կառուցապատման համար հողի գործառական նշանակությունը պետք է փոխվի, այսինքն՝ այն պետք է դառնա հասարակական տարածք: Սակայն ըստ օրենքի` հատուկ պահպանվող տարածքի նշանակությունը չի թույլատրվում փոխել»,- բացատրեց գյուղապետը:
Մշակույթի նախարարությունը, օրենքի համաձայն, առանց գյուղապետի թույլտվությունը ստանալու չի կարող արգելոցի տարածքում որեւէ շինարարություն կամ առեւտրային ծրագիր իրականացնել:
Մինչդեռ Աշոտ Վարդանյանն արդեն երկու անգամ մերժել է իրեն ուղարկված թույլտվության խնդրագրերը, քանի որ չի ցանկանում նախարարության հետ «հանցավոր գործարքի մեջ մտնել» ու ոտնահարել օրենքը: Եթե նախարարությունն այնուամենայնիվ չի ցանկանում հրաժարվել իր հավակնություններից` գյուղապետը խորհուրդ է տալիս` «Թող դիմեն դատարան»:
Կարդացեք նաև
Բայց նախարարությունը հավանաբար ոչ դատարան դիմելու ժամանակ ունի, ոչ էլ այդքան նյարդեր: Ուստի անտեսելով գյուղապետի խորհուրդն ու կարծիքը` տաճարի հարեւանությամբ գտնվող նախատեսված վայրում սկսել է սրճարանի տեղադրումը: Այժմ շինարարական աշխատանքները դադարեցված են վատ եղանակային պայմանների պատճառով, բայց տարածքն արդեն բետոնապատված է: Հաշվի առնելով, որ սրճարանը շարժական է լինելու` շատ բան չի մնացել անելու: Գյուղապետը վստահ է, որ հենց եղանակը լավանա, շինարարությունը կվերսկսվի:
Մեր այն հարցին, թե եթե անտեսեք, որ սրճարանը տեղադրվելու է օրենքի խախտմամբ, այնուամենայնիվ որքանո՞վ է նպատակահարմար արգելոցի պարիսպներից ներս այն տեղադրելը, գյուղապետը պատասխանեց. «Անիմաստ է սրճարանի կառուցումը, քանի որ նախապես կանխատեսելի է, որ դրա հետ կապված հույսերը չեն արդարանալու: Երեք տարի առաջ նման մի փորձարկում կատարվել է, երբ արգելոցի տարածքում առեւտրի կրպակ էին տեղադրել: Սակայն առեւտուր չլինելու պատճառով այն շուտով փակվեց:
Բացի դրանից, տաճարի մուտքը ժամը 7-ից հետո փակվում է, իսկ սրճարան նախաձեռնողները հավատացնում են, թե այն տեղադրելու ողջ նպատակը երեկոյան ժամերին տաճարի տարածքն աշխուժացնելն է: Եթե տաճարը փակվեց` սրճարանն ինչպե՞ս է գործելու»:
Հաշվի առնենք նաեւ, որ Գառնու տաճարի տարածքից դուրս մի քանի սրճարան է գործում, որոնք լուրջ մրցակիցներ կլինեն նորի համար: Բացի դրանից, Գառնի գյուղի տարածքում զբոսաշրջային ընկերությունների հետ համագործակցող եւ արդեն անուն ձեռք բերած մի շարք հացատներ կան, որտեղ էլ զբոսաշրջիկները համտեսում են հայկական խոհանոցի ուտեստները:
Այնպես որ՝ նոր սրճարանը ավելորդ եւ անիմաստ շռայլություն է գյուղի համար:
Թագուհի ԱՍԼԱՆՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
