2013թ.-ի սեպտեմբերի 25-ին Մեղրու տարածաշրջանի Տաշտուն համայնք տանող ավտոճանապարհի խաչմերուկում քարոզչությունից վերադարձող «Ժառանգություն» կուսակցության պատգամավորի թեկնածու Սամվել Հայրապետյանի թիմի եւ ռուս սահմանապահների միջեւ տեղի ունեցած դեպքի մասին այն ժամանակ անդրադարձել էինք:
«Ժառանգություն» կուսակցության Կապանի կառույցի ներկայացուցիչ, այն ժամանակ Սամվել Հայրապետյանի մամլո խոսնակ Դավիթ Հակոբյանը, ում տեսախցիկը միջադեպի ժամանակ ջարդվել էր ռուս սահմանապահների կողմից, մեզ հետ ունեցած զրույցում նշել էր, որ իրենք պատրաստվում են դիմել իրավապահ մարմիններին՝ հարցին իրավական լուծում տալու համար:
Հիշեցնենք, որ ռուս սահմանապահների ներկայացուցիչը ներողություն էր խնդրել կատարվածի համար եւ առաջարկել փոխհատուցել ջարդած տեսախցիկի գումարը, սակայն վերջիններս հրաժարվել էին փոխհատուցվող գումարից եւ գործի ընթացքը տեղափոխել իրավական հարթություն:
«ՀՀ ոստիկանության Մեղրու բաժնում պատրաստված նյութերն ուղարկվել էր ՀՀ ՊՆ քննչական ծառայության իններորդ կայազորային բաժին՝ հետագա ընթացը լուծելու համար: Սույն թվականի հոկտեմբերի 10-ին ՀՀ ՊՆ քննչական ծառայության 9-րդ կայազորային քննչական բաժինը մերժեց մեր հայցադիմումը, որից հետո մենք համապատասխան նամակով դիմեցինք ՀՀ գլխավոր դատախազին,ՀՀ զինվորական դատախազին և ՀՀ Սյունիքի մարզի զինվորական դատախազին: Նոյեմբերի 23-ին ստացանք մերժման պատասխան ՀՀ զիվորական դատախազից: Հավանաբար, քաղ հայցով կդիմենք դատարան, բայց հնարավոր է, որ ընդհանրապես չդիմենք, քանի որ, անկեղծ ասած, որևէ ակնկալիքներ չունեմ արդարադատությունից», – մանրամասնեց Դավիթ Հակոբյանը:
Իսկ հայցադիմումների մերժումը, ինչպես փոխանցեց մեր զրուցակիցը, պատասխանատուները հիմնավորել էին հանցակազմի բացակայությամբ:
Մերի ՍՈՂՈՄՈՆՅԱՆ
