Հարցազրույց ԱԺ ՀՀԿ խմբակցության քարտուղար Հովհաննես Սահակյանի հետ
-Պարոն Սահակյան, վերջերս Դուք հոդված էիք գրել, որում անդրադարձել էիք ՀԱԿ անդամ, նախկինում ԱԳ նախարարի մամուլի խոսնակ Վլադիմիր Կարապետյանին եւ նրա հասցեին մի շարք մեղադրանքներ էիք հնչեցրել, մասնավորապես, ասել էիք, որ նա, փոխանակ դիվանագիտությամբ զբաղվի, բիզնես կապեր է հաստատել եւ բիզնեսով է զբաղվել: Դուք ունե՞ք որեւէ փաստեր, որ նման բան եք ասել:
-Երբ մարդ աշխատում է ինչ-որ մի կառույցում, այնուհետեւ նեղված է կամ նեղացած, եւ այլն, ու այլեւս չի աշխատում այդ համակարգում, սկսում է բաներ խոսել… Այն, ինչ ես ասել եմ՝ բոլորի աչքի առաջ է, ես չէի ցանկանա այսօր մանրամասնել, փաստերի կամ ինչ-որ բաների մասին խոսել, փաստեր մատնանշել եւ այլն:
Միեւնույն ժամանակ՝ ես ճիշտ չեմ համարում, որ երբ ինչ-որ կառույցի մեջ ես, ու ինչ-որ խնդիրներ տեսնում ես, չես բարձրաձայնում, այլ հենց ընդդիմադիրի շապիկը հագնում ես, սկսում ես ինչ-որ բաներ վերհիշել, խոսել, որոշակի գործողություններ անել: Ամեն դեպքում, ես որեւիցե առումով չեմ հրաժարվում իմ ասած որեւէ բառից:
Կարդացեք նաև
-Բայց Դուք ունե՞ք փաստեր, որ նա բիզնեսով է զբաղվել, թե հենց այնպես եք ասել:
-Գիտեք ինչ՝ փաստեր կամ ոչ փաստեր… այսինքն, եթե ես փաստեր ունենամ, պիտի բերեմ ասեմ՝ տեսեք, տեսե՞ք… ես իմ բոլոր ասածներին , իմ ասած բառերին, իհարկե, տեր եմ:
-Դուք նաեւ ասել եք, որ պարոն Կարապետյանը գիշերուզօր իր նախկին գործընկերներին է քննադատում: Բացի ԱԳ նախարարից, նա է՞լ ում է քննադատել, ես ինչ-որ չեմ հիշում…
-Գիտե՞ք ինչ, եթե էդ համակարգին վերաբերող քննադատական խոսք է… Եթե նկատել եք՝ ես չեմ շեշտել՝ նախարարին, կամ այլ… Այդ համակարգում աշխատում են բազմաթիվ մարդիկ, մենք ինքներս լինում ենք տարբեր երկրներում գործուղման մեջ, ու պարբերաբար տեսնում ենք, թե ինչպիսի ծանր աշխատանք է իրականացնում մեր այսօրվա դիվանագիտությունը: Անկեղծ եմ ասում՝ ես չեմ հավակնում բացարձակ ճշմարտության, որովհետեւ ամեն տեղ խնդիրներ կան, եւ կան մարդիկ ու պաշտոնյաներ, որոնք իրենց պարտականությունները պատշաճ են կատարում, եւ կան այնպիսիք, որոնք պատշաճ չեն կատարում: Բայց մենք տեսնում ենք, որ ամբողջ թուրքական եւ ադրբեջանական լոբբին, հսկայական գումարներ ծախսելով, ինչպիսի աշխատանքներ է կատարում: Եվ այդ ծանր պայմաններում, թե ինչպիսի աշխատանքներ են կատարում մեր դիվանագիտական ծառայությունները, մեր հայկական համայնքը, մեր «Հայ դատի» գրասենյակները, որոնց նույնպես չեմ ուզում առանձնացնել:
Դրա համար առնվազն, եթե չկա կոնկրետ որեւէ դեպք, որեւէ խնդիր, որեւէ իրադարձություն, այսպես ասած, ակնառու փաստերով իրավիճակ, որը կարելի է բարձրացնել եւ լուծում տալ, կարծում եմ, ճիշտ չի, ընդդիմադիր կեցվածքից ելնելով, ամեն ինչ քննադատել ու սեւացնել: Իմ խոսքն ուղղված էր դրան՝ առանց մասնավորեցնելու, ընդհանրապես, եւ ոչ թե Վլադիմիր Կարապետյանին…
– Բայց Դուք խիստ մասնավորեցրած եք ասել եւ անգամ անձնական, եթե չասեմ վիրավորանքներ, խիստ որակումներ եք տվել…
– Ես առհասարակ եմ ասել: Հիմա դրա ժամանակն էլ չէ, որովհետեւ չեմ ուզում կենտրոնանալ իր վրա, դրա առիթն էլ չունեմ: Առհասարակ եմ ասում, որ ընդդիմադիր կեցվածքով խոսացողները շատ- շատ են՝ առանց խորանալու կամ առանց իրենց անցյալն ու կատարած աշխատանքը այդ նույն օղակում հիշելու… Այն ժամանակ էլ խոսեիք, այն ժամանակ այդ ամենի մեջ էիք, շատ ավելի լուրջ փաստեր ունեիք, ասեիք ձեր ասելիքը…
Մելանյա ԲԱՐՍԵՂՅԱՆ
Հենց ասելիքն ասելու համար կամ էլ ձեզ չծափահարելու համար, 37թ-ի մեթոդներով շատերն են մեկուսացվել իրեց պաշտոններից,որպեսզի ձեց նման ուճաված և ուռած գլուխները հանգիստ ապրեն:
Ձեր հհկ-ական ,,հավատամքը,, տեղավորվում է ,,նախանձ,, ,,չարախոսություն,, ,,ցեխ շպրտել,, ,,չարակամ,, և այլ արտահայտությունների արժեհամակարգում :Եվ այդ սնսնկ ու ողորմելի մտավարժանքներով երկիր եք կործանում…և ձեր թուքումուրի սովոր երեսը պարզել..
( ՀՀ անկուսակցական քաղաքացի )