«Սյունիքի, Տավուշի, Արարատյան մարզի հովիտներում արդեն ծիրանի ու սալորենու ծառերը բողբոջել են: Սա կապված է հարավային տաք հոսանքների ներթափանցման հետ: Այդ իսկ պատճառով ողջ փետրվարին տաք է եղել: Այնուամենայնիվ, եթե ծառերը շուտ են բողբոջում, ապա ցրտահարության վտանգ կա: Մարտին ջերմաստիճանը 1-2 աստիճան բարձր կլինի նորմայից, տեղումներն էլ շատ կլինեն: Այս շաբաթ ամպամածություն է դիտվելու եւ անձրեւ է լինելու»,-այսօր «Հենարան» ակումբում ասաց ԱԻՆ Հիդրոմետ ծառայության պետի տեղակալ Գագիկ Սուրենյանը, որը խոսեց առաջիկա օրերի և մարտ ամսվա եղանակակլիմայական պայմանների մասին:
«Ցրտահարության մասին խոսելը վաղ է, հուսանք, որ անոմալ ցրտահարություն չի լինի, մարտն այն ամիսն է, որ կլիմայական պայմանների կտրուկ փոփոխություն է լինում, բայց միջին կտրվածքով ընդհանուր ամիսը դիտում ենք տաք: Ինչ վերաբերում է կարկուտին, ասեմ, որ չի եղել մի տարի, որ ՀՀ տարածքում կարկուտ չլինի, ամենաշատը Լոռու, Տավուշի և Շիրակի մարզերում են լինում: Ամենախոշոր կարկուտը դիտվում է հուլիսին և օգոստոսին»,- նշեց նա:
Գագիկ Սուրենյանն ասաց, որ մինչև մարտի 7-ը Հայաստանում կդիտվի առանց տեղումների, տաք եղանակ, իսկ մարտի 8-ին ջերմաստիճանը Լոռու, Տավուշի և Սյունիքի մարզերում ցերեկը 8-10 աստիճանով կնվազի և նորից կբարձրանա:
Քրիստինե ԳՐԻԳՈՐՅԱՆ
