Այսօր կառավարության նիստը բացելիս վարչապետ Տիգրան Սարգսյանը հայտարարեց, որ կառավարությունը պատրաստ է երկխոսել «Դեմ եմ» շարժման հետ:
Տիգրան Սարգսյանի խոսքերով՝ շարժման անդամները հիմնականում երիտասարդներ են, որոնք բազմիցս նամակներ են գրել կառավարությանը եւ ներկայացրել իրենց մտահոգությունները պարտադիր կուտակային կենսաթոշակային համակարգի վերաբերյալ: «Նամակում կա մտահոգություն այս ռեֆորմի մասին, զգացվում է պատասխանատվություն մեր երկրի հանդեպ: Իրենց բառերով՝ իրենք սիրում են այս երկիրը եւ ուզում են, որ այն ունենա պայծառ ապագա»,- ասաց Տ. Սարգսյանը:
Վարչապետի դիտարկմամբ՝ Հայաստանում ձեւավորվում է քաղաքացիական հասարակություն, որը թելադրում է իր կանոնները, սա նշանակում է, որ կառավարությունը պետք է իր գործունեությունը շտկի եւ դարձնի այնպիսին, որ հաշվի առնեն՝ կարեւոր խնդիր է նպաստել ու խթանել քաղաքացիական հասարակության կայացմանը:
«Մենք հայտարարում ենք, որ պատրաստ ենք երկխոսության, որովհետեւ այն դիրքորոշումը՝ կամ ամեն ինչ կամ ոչինչ, անընդունելի է ինչպես մեզ համար, այնպես էլ քաղաքացիական հասարակությունը ներկայացնող երիտասարդների համար: Մենք պատրաստ ենք երկխոսության եւ ընդունում ենք, որ մեր օրենքները, մանավանդ ամենաբարդ ռեֆորմին վերաբերողը, չեն կարող լինել առանց թերությունների եւ ճիշտ ճանապարհը երկխոսությունն է: Հրավիրում ենք «Դեմ ենք» շարժման ակտիվիստներին երկխոսության»,- ասաց ՀՀ վարչապետ Տիգրան Սարգսյանը:
Կարդացեք նաև
Նելլի ԲԱԲԱՅԱՆ
