Ինչպես արդեն տեղեկացրել ենք, այս պահին նախագահ Սերժ Սարգսյանի մոտ տեղի են ունենում քաղաքական կունսուլտացիաներ`վարչապետ նշանակելու հարցով: ՀՅԴ-ական պատգամավորները նախագահի հետ հանդիպմանը եկան ու գնացին ետնամուտքից`լրագրողների աչքից հեռու:
ԲՀԿ-ական պատգամավորները թեեւ նախագահի նստավայր մտան կենտրոնական մուտքից, բայց այնտեղից առ այս պահը այդպես էլ դուրս չեկան: Լրագրողները ենթադրում են, որ նրանք էլ հեռացան ետնամուտքից, քանի որ 18.00-ին պետք է մեկնարկեր նախագահի հանդիպումը ՕԵԿ-ական պատգամավորների հետ:
Մինչ այժմ, ԲՀԿ-ական պատգամավոր Վարդան Օսկանյանի մեքենան նախագահական նստավայրի դիմացի մայթին էր կանգնած, քիչ առաջ այն շարժվեց նախագահական նստավայրի ետնամուտք, ավելի ուշ`այդ ուղղությամբ էլ հեռացավ:
Խոսակցություններ են շրջանառվում, որ նախագահի հետ հանդիպմանը եկել էր նաեւ ԲՀԿ առաջնորդ Գագիկ Ծառուկյանը, որն, ի տարբերություն իր պատգամավորների, նախագահական ապարատ էր մտել ետնամուտքով:
Կարդացեք նաև
Ավելի ուշ նախագահի հետ հանդիպումից հետո ՕԵԿ-ական պատգամավորները նույնպես հեռացան նախագահական նստավայրի ետնամուտքից` առանց լրագրողների հետ շփվելու:
Նելլի ԳՐԻԳՈՐՅԱՆ
