«Ոչ ես, ոչ որևէ բարձրաստիճան պաշտոնյա ՀԷԿ-ի կառուցման հետ կապ չունենք: Եթե ես ցանկություն ունենամ կառուցելու, նախ ես այդքան հնարավորություն չունեմ, երկրորդն էլ չեմ ամաչի, կասեմ» ,- այսօր խորհրդարանում, 2013 թվականի բյուջեի կատարողականի քննարկումների ժամանակ հայտարարեց Արագածոտնի մարզպետ Սարգիս Սահակյանը:
Նա պատասխանում էր ՀԱԿ պատգամավոր Նիկոլ Փաշինյանի` մարզում ՀԷԿ-ի կառուցման հարցին, որը տեղացիների դժգոհությունների պատճառ դարձավ, մարդիկ անգամ փողոց դուրս եկան`բողոքի ակցիաներով, ճանապարհներ փակեցին: Հիմնական մտավախությունն այն էր, որ ՀԷԿ-ի կառուցումը կնպաստի ոռոգման ջրի սակավությանը:
Մարզպետը խորհրդարանում հայտարարեց, որ ՀԷԿ-ի կառուցումն արգելվել է`հավելելով, որ իր կարծիքով գյուղացիների դժգոհություններն անհիմն էին:
Սարգիս Սահակյանը համառորեն չէր նշում «անհատ քաղաքացու» անունը, որը ցանկանում էր կառուցել ՀԷԿ-ը: Նիկոլ Փաշինյանն այդ առիթով նկատեց, որ
«իշխանություններն այդ անհատ քաղաքացու անունն ավելի եռանդով են գաղտնի պահում, քան պետական գաղտնիքները» եւ մարզպետին հորդորեց. «Անունն ասեք, թեման թող փակվի»:
Սարգիս Սահակյանը դեմքին հիշողությունը փորփրելու արտահայտություն տվեց ու ասաց, որ չի հիշում այդ մարդու անունը`հավելելով, որ մամուլում բոլոր տվյալները հրապարակվել են եւ եթե պատգամավորը շատ է ցանկանում, կարող է փորփրել եւ գտնել:
Նելլի ԳՐԻԳՈՐՅԱՆ
Կարդացեք նաև
