Կոտայքի մարզի ընդհանուր իրավասության դատարանում բավական լարված մթնոլորտում այսօր սկսվեց ապացույցների հետազոտումը:
Դատավոր Վաղինակ Մկրտչյանը հրապարակեց ավտովթարի դեպքի վայրի զննության արձանագրությունը (20.10.2013թ.), ապա դեպքի վայրի լրացուցիչ զննության արձանագրությունը, տրանսպորտային միջոցի զննության, գրանցման, տուժողներ Հակոբյանների հագուստների առգրավման («Արմենիա» բուժկենտրոնից), տուժող, «Նիվայի» վարորդ Արթուր Հակոբյանի, BMW-ի վարորդ Վարդան Պետրոսյանի խմածության, բուժկենտրոն ընդունվելու, նրանց խմածությունը ստուգելու փաստաթղթերը:
Երբ դատավորը հրապարակեց դեպքի վայրի արտաքին նկարագրությունը՝ «բնական լուսավորության պայմաններում, ասֆալտապատ, չոր, սակայն յուղոտ… թափված են պլաստմասսե եւ ապակու բեկորներ», Վարդան Պետրոսյանի պաշտպան Նիկոլայ Բաղդասարյանն ասաց, որ դեպքի վայրի լրացուցիչ զննություն սովորաբար արվում է նրա համար, որ «հետքերը, որոնք չեն եղել, լրացվեն, բազմաթիվ հետքեր չեն արձանագրվել եւ դեպքի վայրի արձանագրության մեջ չկա որեւէ հղում»:
Ըստ նրա, դեպքի վայրը եղել է կողանկում, ավտոմեքենայի կողասահքի հետքերը չեն արձանագրվել եւ հնարավոր չէ մի դեպքում արձանագրել այլ հետքերը, իսկ ավտոմեքենայի անվադողի արգելակման հետքերը չնկատել:
Կարդացեք նաև
Այդ ընթացքում թե մեղադրանքի կողմը եւ թե դատավորը փորձեցին ընդհատել պաշպանին, մեղադրող Ա. Սարգսյանն անգամ դիմելով դատարանին հարցրեց՝ «մենք լսում ենք Բաղդասարյան Կոլյայի ենթադրություննե՞րը», սակայն պաշտպանական կողմը երկու արձանագրությունները կարողացավ համադրել:
Տուժողների ներկայացուցիչ Ռուբեն Բալոյանը հարցրեց. «Նիկոլայ Բաղդասարյանը ցուցմո՞ւնք է տալիս՝ Վարդան Պետրոսյանի փոխարեն»: Նախագահողը հրապարակեց պետական սահմանը փակելու մասին քննիչի գրությունը՝ ուղղված պատկան մարմիններին, մինչեւ Վարդան Պետրոսյանի նկատմամբ քրեական գործի ավարտը:
Մանրամասները՝ առաջիկայում:
Ռուզան ՄԻՆԱՍՅԱՆ
